АҞӘА, ԥхынҷкәын 23 — Sputnik. Аԥсны иамоуп алшара урыстәылатәи аџьырмыкьаҟны ҭырқәтәылатәи амандаринақәа рыԥсахра иҳәеит Урыстәылатәи Афедерациа Аԥыза-министр ихаҭыԥуаҩ Александр Хлопонин. Абри атәы иара ажурналистцәа иреиҳәеит реиҿцәажәараан.
"Алшара акәым, иҟаҳҵаҵәҟьоит", — иҳәеит иара аҳәынҭқаррабжьаратә комиссиа аилатәара анхыркәшаха ашьҭахь.
Аԥсны Аԥыза-министр Артур Амқәаб иазгәеиҭеит Аԥсны ацитрусқәа Урыстәылаҟа рынашьҭра ахышәа-ҵышәа аизырҳара гәҭакны ишамоу.
"Уажәазы иааҳрыхуеит 50 000 тонна рҟынӡа ацитрустқәа. Иҳамоу зегьы Урыстәылаҟа иҳашьҭуеит. Ҳгәыӷуеит ари ахышәа-ҵышәа ԥхьаҟа еизҳап ҳәа", — иҳәеит иара.
Иара убри аамҭаз иазгәеиҭеит иныҭкааны аԥсахра ҳалшарым ҳәа.
"Инагӡаны аԥсахра ҳалымшаргьы иҳамоу наҳашьҭуеит. Сынтәа 40 000 тонна рҟынӡа Урыстәылаҟа иҳашьҭхьеит. Егьырҭ, ареспублика аҩныҵҟа ахархәара роуеит. Ҽааназы ҳаиҳахашт, избанзар аҽаҩра аазышьҭуа аплантациа ҿарақәа ыҟоуп", — иҳәеит иара.
