АҞӘА, ажьырныҳәа 2 – Sputnik, Асида Кәыҵниаԥҳа. Аҟәа ақалақь Ахадара жәларбжьаратәи аимадарақәа рыҟәша аиҳабы Ирина Шьониаԥҳа иаҳзеиҭалҳәеит арҭ амшқәа рзы ақалақь Ахадара адныҳәаларатә шәҟәы рацәа шаиуз.
"Аҟәа ешьара азызуа ақалақьқәа адныҳәаларатә шәҟәқәа ҳзаарҭиит. Волгоград, Тамбов, Тирасполь авидеоткрыткақәа ҳзаарҭиит. Ажьырныҳәа амза цонаҵы ҳара иҳаулашт анасыԥи аҭынчреи ҳзеиӷьашьауа адныҳәаларатә шәҟәқәа". — лҳәеит Шьониаԥҳа.
![Письма из города побратима Килмарнок, Шотландия.1995. Письма из города побратима Килмарнок, Шотландия.1995. - Sputnik Аҧсны](https://cdnn1.img.sputnik-abkhazia.info/img/101677/79/1016777972_0:0:6016:4016_600x0_80_0_0_36981297848ec6898593b8d77e9c8006.jpg)
Лара иазгәалҭеит адныҳәаларатә шәҟәы шааз Шотландиатәи ақалақь Килмарнок аҟынтәигьы.
"Уи ақалақьи Аҟәеи акрааҵуеит аиҩызара бзиа рыбжьоижьҭеи. Иазгәаҭатәуп уаҟа ишыҟоу Ҳџьынџьтәылатә еибашьраан иҭахаз ргәалашәара иазку абаҳчара", ацылҵеит Шьониаԥҳа.
Аҳҭнықалақь Ахадара жәларбжьаратәи аимадарақәа рыҟәша аԥҵан уаанӡатәи ақалақь Ахада Алиас Лабахәуа иаԥшьгарала. Иахьатәи аамҭазы аҟәша анапы аҵанаҩхьеит ҩеижәижәаба инареиҳаны аиҩызареи аиашьареи рзы аиқәшаҳаҭрақәа.