АҞӘА, ажьырныҳәа 16 – Sputnik, Роберт Џьапуа. Аԥсны автомабилтә спорт Афедерациа иаусдҵа хаданы иҟалоит автотранспорт аҿиареи аныҟәара ашәарҭадареи, иҳәеит Аԥсны автомабилтә спорт Афедерациа апрезидент Џьумбер Соломко.
"Ҳфедерациа шьаҭаркын ааигәа, 2016 шықәса ажьырныҳәа 11 рзы. Аԥсны автоспорт аартра реиҳа ихаданы ҳахәаԥшуеит. Нас иаҳҭахуп ахәыҷқәа рзы автошкола аартра. Урҭ рышьҭахь иус хаданы ҳахәаԥшуеит Аԥсны автотранспорт шәарҭарада аныҟәара", — иҳәеит Соломко.
Соломко иажәақәа рыла ԥхьаҟазы иазыԥхьагәаҭоуп автодроми автомабил-спорттә дәи раартра. Уаҟа ахәыҷқәа иддырҵалоит автомабил арныҟәашьеи аныҟәара аԥҟаррақәеи.
"Ҳара уажәы ҳашьҭоуп автодром азы аҭыԥ аԥшаара. Ҳәарада идуу аҭыԥ аҳҭнықалақь иацәыхарамкәа иаҳҭахуп. Ишазгәаҳҭо еиԥш ҳусқәа ҟалар даара ибзиахоит зегьы", — иҳәоит иара.
Иара агәра игоит ареспубликаҟны ишырацәо еиуеиԥшым автомабилтә еицлабрақәа ахьымҩаԥугаша аҭыԥқәа.
"Афуникулиор ухы иауырхәар алшоит. Иалшоит Очамчыраҟа узго амҩаду ахархәара. Афедерациа анӡыраҳгалак ашьҭахь урҭ аҭыԥқәа иныҭкааны ҳрызхьаԥшышт", — ҳәа азгәеиҭеит Соломко.
Џьумбер Соломко иара убасгьы иазгәеиҭеит жәабранмза нҵәаны мшаԥымза алагамҭазы Афедерациа аофициалтә ӡыргара мҩаԥысраны ишыҟоу. Ауснагӡатә ахь иааԥхьахоит атәыла анҭыҵынтәигьы аспортсменцәа.
