АҞӘА, ажьырныҳәа 29 — Sputnik, Саид Барганџьиа. ПАСЕ апрезидент ҿыц иинаугурациатә жәахә аҟны еиҭахгьы ишьақәирӷәӷәеит Евроеидгыла аполитикатә хырхарҭа еиҭакра шамоуа, Аԥсни Аахыҵ Уаԥстәылеи рганахьала Қырҭтәыла адгылара шанаҭо.
"Аҽазныкгьы гәыхьрыла иазгәаҳҭоит Аладатәи Кавказ аганахьала Евроеидгыла аполитика аҽшамԥсахыз, 2008 шықәса раахыс уи аҽшеиҭанакызгьы", ҳәа аҳәоит Аԥсны Адәныҟатәи аусқәа рминистрра аофициалтә саит.
Аԥсны Адәныҟатәи аусқәа рминистрраҟны иазгәарҭеит аԥсуа ган шадгыло ПАСЕ апрезидент имоу ашәарақәа – арегион аҟны ашәарҭадара аганахьала. Иара убри аамҭазы иазгәарҭоит ашәарҭара зхылҵуаны иҟоу Қырҭтәыла шакәу.
"Акыршықәса ҵуеит Қырҭтәыла аҭагылазаашьа архәанчара иаҿуижьҭеи, аҳәынҭқаррабжьаратә еимакқәа ҭынчрыла рҭышәныртәалара иаԥырхагоижьҭеи", ҳәа аҳәоит Аҳәамҭаҟны.
Аԥсны Адәныҟатәи аусқәа рминистрраҟны иазгәарҭеит Қырҭтәыла шакәу бџьаршьҭыхлатәи ақәгыларақәа зегьы хацзыркуа.
"Қырҭтәыла аганахьала апровокациақәа раанкылара алшеит урыстәылатәи агани ҳареи аҳәаахьчаразы аиқәшаҳаҭра ҳнапы анаҵааҩ инаркны", ҳәа азгәаҭоуп аҳәамҭаҟны.
Абасала, Аԥсны Адәныҟатәи аусқәа рминистрраҟны иазгәарҭеит ашәарҭара зхылҵуаны иҟоу Қырҭтәыла шакәу.
ПАСЕ апрезидент ҿыц Педро Аграмунт иинаугурациатә жәахә аҟны еиҭахгьы ишьақәирӷәӷәеит Евроеидгыла аполитикатә хырхарҭа еиҭакра шамоуа, Аԥсни Аахыҵ Уаԥстәылеи рганахьала Қырҭтәыла адгылара шанаҭо, асеиԥш иҟоу аимакқәа Европа ашәарҭадара аҵшәааразы шәарҭаны ишыҟоу.
