АҞӘА, жәабран 1 —Sputnik, Асида Кәыҵниаԥҳа. Аҟәа ақалақь Ахада ацхыраара ҟаиҵоит Аҟәа ақалақь аҟны аинрал-леитенант Сергеи Дбари аинрал-леитенант Сулҭан Сосналиеви рбиустқәа рықәыргыларазы.
"Ари азҵаара аӡбра азутәуп, Акультура аминистрреи Аминистрцәа Реилазаареи ҳареи ҳаилацәажәарала. Сара адгылара асҭоит абиустқәа Ахьӡ-аԥша апарк аҟны рықәыргылара", — иҳәеит ақалақь Ахада Адгәыр Ҳаразиа.
Аҟәатәи ақалақьтә еизара ахантәаҩы Константин Ԥлиа ажәалагала ҟаиҵеит Ахьӡ-аԥша апарк аԥҵаны уа абиустқәа ықәыргылазарц.
"Азҵаара алацәажәараан ицәырҵит аидеиа – Ахақәиҭра апарк аҟны Ахьӡ-аԥша Аллеиа аԥҵазарц, уаҟа афырхацәа, аҵарауаа, Аԥсны зыхьӡ нагоу ауаа рбиустқәа ықәыргылахарц", — иҳәеит Константин Ԥлиа.
Сергеи Дбар ибиуст амодель аус адулара даҿын Стас Иуанба. Сулҭан Сосналиев ибиуст аԥиҵеит Амиран Адлеиба. Иара ицхраауан Руслан Габлиеи Адгәыр Ӡиӡариеи. Иахьатәи аамҭазы абиустқәа Аԥсны Ахьӡ-аԥша амузеи аҟны иҟоуп.
