Гәдоуҭа, жәабран 2 — Sputnik, Рада Ажьиба. Гәдоуҭатәи араионтә хәышәтәырҭа ачымазаҩцәа рыдкылараз ихиоуп, абри атәы иҳәеит ахәышәтәырҭа аҳақьым хада, амедицинатә наукақәа ркандидат Ҳаџьараҭ Шамба.
"Ахәышәтәырҭа аусуҩцәа азыхиоуп ирылшо ала, иаҳзааиуа апациентцәа ацхыраара арыҭаразы. Аха еиԥымҟьарада, ганрацәала ацхыраара арыҭараз еиуеиԥшым аҟәшақәа рыҟны иҳагу рацәоуп, уи акырӡа ҳусура иаԥырхагоуп", — иҳәеит Шамба.
Араионтә хәышәтәырҭа аҟны еиҿкаауп: адкыларҭеи, ачымазара ашьықәыргылареи, атерапиеи, ахирургиеи, ахәыҷтәи, ахәыҷышьҭыхҩыи, аҿкыи, ацхыраара ласыи рыҟәшақәа.
"Иахьазы, атерапиа аҟәша ауп инаӡаны аус зуа. Араҟа ишьҭоу ачымазаҩцәа ргәаҭаразы иахәҭоу амаругақәа зегьы ҳамоуп. Ихиоуп арентгеныи, а-УЗИ ахьыҟарҵо ауадақәа. Иара убас, аихагылақәа зегьы рыҟны иҳамоуп аҵәыҵәри ала еибыҭоу апалатақәа", — ҳәа азгәеиҭеит аҳақьым хада.
Ахшараиуратәи ахирургиеи рыҟәшақәа рыҟны аԥҟарҭатә уада ишахәҭоу еиқәыршәам.
"Раԥхьа иргыланы, напы аҳыркоит аԥҟарҭатә уадақәа реиҿкаара, ара иргылатәуп аоперациа ахьымҩаԥырго астоли, иахәҭоу алашарбагақәеи. Иара убас, арҩышьыга ахьыҟарҵо ауадеи. Арҭ азҵаарақәа хылаԥшра азыруеит Аԥсны аҳәынҭқарра агәабзиарахьчара аминистрра. Ҳақәгәыӷуеит, иаарласны ирыӡбып ҳәа", — иациҵеит уи.
Аҿкыи, ацхыраара ласы ахьрырҭо рыҟәшақәа, уаанӡеиԥш хазы хыбраны игылоуп.
"Аинфекциатә ҟәшаҿы иҳамоу ажәытә маругақәа рыла имҩаԥаагоит алабораториатә анализқәа зегьы. Ацхыраара ласы аҟәша атәы ҳҳәозар, ара уамак ҵуам, араион анапхгара иҟанаҵаз афинанстә цхыраара иабзоураны иаахәын амашьына ҿыц. Иааидкыланы араион аҿы иҳамоуп, ацхыраара ласы аҿы аус зуа ҩ-гәыԥки, иара убас, иахьатәи ҳаамҭа иақәшәо ачымазаҩцәа хара ргаразы — ареанимобиль", — иҳәеит ахәышәтәҩы.
Иазгәаҭатәуп, Гәдоуҭатәи араионтә хәышәтәырҭа шыргылаз 1973 шықәса рзы. Аҵыхәтәантәи аамҭаз ахыбра аҭагылазаашьа уадаҩын, аиҭашьақәыргыларатә усурақәа хымԥадатәыин.
