АҞӘА, жәабран 3 — Sputnik, Бадраҟ Аҩӡба. Амонументалтә ҟазаразы Аҳәынҭқарратә комиссиа Аԥсны аԥхьатәи Ахада ибаҟа аус адулара иалагароуп 2016 шықәса рзы, иҳәеит Артур Амқәаб Аминистрцәа Реилазаараҟны аҩаша, жәабран 2 рзы имҩаԥысуаз аилатәараҟны.
"Сгәы иаанагоит абаҟа иҟоу ансамбль иахәҭакхароуп ҳәа. Сара сгәаанагарала Арӡынба ибаҟа акәша-мыкәша иара еиҳа изааигәаз, ивагылаз Сулҭан Сосналиев, Сергеи Дбар, Мушьни Хәарҵкиа реиԥш иҟақәаз рбаҟақәа ргылатәуп. Сахьахәаԥшуала ари аинтерес аҵоуп", — иҳәеит Аԥыза-министр.
Амқәаб иажәақәа рыла Аԥсны инарылукааша ауаа ргәалашәара наӡаӡахарц азы еиҵагыло абиԥарақәа реиҵааӡара иахәоит. Иара убасгьы иазгәеиҭеит аскульптурақәа рхаҭабзиара иҳараку аҩаӡара рымазароуп.
Акомиссиа иара убасгьы иаднакылеит аӡбра Гьаргь Ӡиӡариа, Николаи Ақырҭаа, Иуа Кәаӷәаниа рбаҟақәа раԥҵаразы аиндаҭлара рылаҳәазарц.
"2013 шықәса рзы абаҟақәа раԥҵаразы аиндаҭлара рылаҳәан аха аҵыхәанӡа инагӡамызт", — лҳәеит Акультура аминистр Ельвира Арсалиаԥҳа.
Аԥыза-министр ажәалагала ҟаиҵеит Гьаргь Ӡиӡариа ибаҟа иара ихьӡ зху апарк аҟны иргылахарц азы.
"Сгәы иаанагоит аусурақәа аҭыԥантәи асахьаҭыхыҩцәеи аскульпторцәеи имҩаԥыргалароуп ҳәа. Анҭыҵынтәи рааԥхьара аҭаххар, уи аԥаратә уадаҩрақәа шацугьы – иааҳаԥхьап", — иҳәеит иара.
Амонументалтә ҟазаразы Аҳәынҭқарратә комиссиа аԥҵан 2015 шықәса жьҭаара 29 рзы. Иара иаусдҵа хаданы иҟоуп Акультура аминистррахь инарго ажәалагалақәа рыхәаԥшра, абжьагарақәа рыҟаҵара, акультуратә ҭынха асахьаркыратә обиектқәа аҳәынҭқарратә реестр ралагалара.
