АҞӘА, жәабран 5 — Sputnik, Саид Барганџьиа. Аԥсны Аԥыза-министр актәи ихаҭыԥуаҩ Шамил Аӡынба имҩаԥигоз апресс-конференциаҟны иаҳзеиҭеиҳәеит апаспортқәа аус рыдулара шцо атәы. Апаспорт ҿыцқәа аус рыдулара хыркәшахоит, иҳәеит Аӡынба.
Шамил Аӡынба иазгәеиҭеит аполиграфиатә усурақәа 40 миллион мааҭ шрықәырӡхаз, аусуразтәи амыругақәа – 24 миллион мааҭ, аелектронтә система – 16 миллион мааҭ.
"Ҳәарада арҭ аԥарақәа маҷӡам, аха ада ԥсыхәа ыҟам. Раԥхьа иргыланы аҳәынҭқарратә шәарҭадаразы", — иҳәеит Аӡынба.
Иара иазгәеиҭеит апаспортқәа рыхәԥса шыҟац ишаанхо (420 мааҭ).
Аӡынба иажәақәа рыла аусурақәа хыркәшоуп уҳәар ауеит. Аелектронтә система аԥҵоуп, аус ауеит.
Аӡынба иҳәеит иааиуа амчыбжь азы аиндаҭларатә шьаҭала апроваидер иалкаара шымҩаԥгахо.
"Апаспорттә столқәа зегьы системак иаҵанакуа иҟалоит, ҳара уажәы асистема аусура зырмариаша, еиқәзыршәаша апроваидер даҳҭахуп", — иҳәеит Аӡынба.
Асистема аус ауеит. "Иара ГОЗнак азанаҭуаа игәарҭеит" иҳәоит иара.
Аӡынба иажәақәа рыла атехникатә зҵаарақәа аҭыԥ рымоуп, аха ГОЗнак аҟынтәи ҳколлегацәа рыцхыраарала азҵаарақәа рыӡбра алыршахоит.
Шамил Аӡынба иазгәеиҭеит асистема ҿыц аҿы ишазыԥхьагәаҭоу "амобилтә еиҭаҵрақәа" — хаҭала иааины апаспорт аиура злымшо рзы. Иҳәеит иара убасгьы сааҭк аҩныҵҟала 50-60 паспорт реиҿкаара шалнаршо иҟоу атехника.
Аԥыза-министр актәи ихаҭыԥуаҩ иазгәеиҭеит апаспорт столқәа ԥшьба аусура ишазыхио, амыругақәа ареспубликаҟны иҟоу апаспорт столқәа 13 рзы ишааго.
