Ажьырныҳәа 25 инаркны Аԥсны аамҭа-аамҭала афымцамч дырцәоит. Аԥсны фымцамчла аиқәыршәара апроблемақәа дрылацәажәеит "Амшынеиқәафымцамч" апресс-маӡаныҟәгаҩ Алхас Гагәылиа. Аиҿцәажәара мҩаԥигон Саид Барганџьиа.
— ЗҲәА "ИгрыГЕС" адиректор хада Леван Мебониа иинтервиу иахышәҳәаауазеи?
— Аҵыхәтәантәи аамҭақәа рзы ауаажәларра рҟны аинтерес ду цәырнагеит Аԥсны фымцамчла аиқәыршәареи, афымцамч нхамҩа аҭагылазаашьеи, аус шауеи рызҵаара. Ауаа азҵаауеит иҟоу шыҟоу. Аус шауа.
— Асеиԥш аҭагылазаашьа уадаҩ ахь ҳкылызгазеи?
— Аинформациа азымхара мамзаргьы иара ииашамкәа аилкаара ацәажәара рацәа цәырнагеиеит. Ирацәоуп иҵаҵӷәыдоу ауҳәан-сҳәан. Ауаа аофициалтә хыҵхырҭақәагьы рыгәрагара рымам. Уигьы еилыскаауеит. Абасеиԥш аан ҳаилак ишалшоу ала иаартны ауаа идеилнаркаауеит иҟоу. Урҭ зегьы шәара ижәдырыр шәылшоит ҳинформациатә ресурсқәа, ҳусзуҩцәа ринтервиуқәа, АИХ (СМИ) рыҟны.
— Агәра абанӡоугар алшо Мебониа иинтервиу?
— Ишыжәдыруеиԥш ЕгрыГЕС акомплекс ақырҭцәеи ҳареи ҳабжьара еихшоуп. Џьвартәи аӡеизакырҭеи аплотина ахаҭеи Қырҭтәыла аҵакырадгьыл иаҵанакуеит. Мебониа далацәажәон атехникатә ҭагылазаашьа. Ииҳәоз аҟны шьаҭаркыганы иман аҭаҩра зуа амыругақәа рырбарақәа.
— Қырҭтәыла ЕгрыГЕС ахы ианамырхәозар, аплотина адыркыр алымшаӡои?
— Мебониа ишиҳәоз еиԥш аӡынтәи аамҭазоуп афымцатәелектростанциа иоунашьҭуа афымцамч зегьы Аԥсныҟа ианаауа. Егьыс, еихшоуп абасеиԥш: ақырҭцәа 46 процент роуа, аԥсуаа – 54 процент роуа ҳәа. Ииашоуп Қырҭтәыла ЕгрыГЕС ада ԥсыхәа рымамкәа иҟаӡам, аха мапгьы ацәыркуам.
— Уажәы имҩаԥааго аекономикатә усқәа иҟарҵома алшара аҭагылазаашьа ҭышәынтәаларц азы?
— Иҟоу зыхҟьаз изныкымкәа ҳалацәажәахьеит – аиҳарак аԥсабаратә ҳауатә ҭагылазаашьақәа роуп. Урҭ уажәазы ҳрықәгәыӷыртә иҟам. Убри инадҳәаланы аиҳабыра алацәажәоит агәыларатә ҳәынҭқарраҟынтәи афымцамч ҳауа аҟаҵара. Аԥхын иҳақәло ауал ҳархынҳәуеит. Ажәалагала аус адулара иаҿуп.
