Гагра инхо ауаа излеиҭарҳәо ала, Аԥсны зегь реиҳа акыр зхыҵуа ахапыцхәашәтәҩы дара рҿы аус иуеит. 79 шықәса зхыҵуа Борис Николаи-иԥа Ианогиан уахьихәаԥшуа дыбзиахәха дыҟоуп, ипациентцәа гәыразрыла дрызнеиуеит, аха иҟаиҵо иус ишахәҭо имҩаԥигоит.
Ианогианаа рҭаацәараҿы иҵегьы аҳақьымцәа ыҟоуп. Иаҳәшьеиҳабгьы дхапыцхәашәтәҩуп, иара убас иашьагьы, уи Ростов дынхоит. Раҳәшьа лоуп амедицинатә факультет ахь рҭалара зыбзоуроу.
1993 шықәсазы аибашьра анцоз Борис Николаи-иԥа изанааҭ даҽа ганкахьала дазнеир акәхеит.
"Аибашьра ианалага асанаториа адыркит. Саргьы аҩны стәан. Хирургс уаҟа аус зуаз дақырҭуан. Дықәҵны дцеит. Аҳақьым хада Валентина Чачԥҳа сналыԥхьеит усураҳәа. Абас, 1993 шықәса рзы схирургхеит"
Иахьа Борис Николаи-иԥа хирургк иаҳасаб алоуп ауаа шидикыло. Иара излеиҳәо ала апациентцәа зегьы хаҭалатәи азнеишьа рҭахыуп. Иаҭаххара уагьԥсихологхароуп, еиҳаракгьы ахәыҷқәа анааиуа.
