АҞӘА, жәабран 12 — Sputnik, Бадраҟ Аҩӡба. Аусеицура Жәларбжьаратәи афонд, Аԥсны иҟоу урыстәылатәи абизнес адгыларатә центр "Аидгылара", азакәанԥҵара аҿиареи азинтәи аекономикатәи ҭҵаареи Рцентр аԥшьаша, жәабран 11 рзы аиқәшаҳаҭра анапаҵаҩра иазкыз аиԥылараан Аусеицура Жәларбжьаратәи афонд ахантәаҩы Вахтанг Ԥиԥиа иҳәеит Аԥсны аинвестициатә ҭагылазаашьа еиӷьтәтәуп ҳәа.
"Афонд ашәқәа урыстәылатәи абизнес Аԥсны аҭагылазаашьа маншәалақәа аиур зҭаху зегьы рзы иаартуп", — иҳәеит Вахтанг Ԥиԥиа.
Аԥсны иҟоу урыстәылатәи абизнес адгыларатә центр "Аидгылара" адиректор хада Анна Калиагина илҳәеит агәыӷра шлымоу рнапы зҵарҩыз аиқәшаҳаҭра Аԥсны анаплакыҩцәа ирԥылало аԥынгылақәа хра рыманы рыӡбра алнаршап ҳәа.
"Ҳара иахьа ҳнапы аҵааҩит аиқәшаҳаҭра. Иара азырхоуп ҳусеицура арҿиара, ахаҭабзиара аиӷьтәра. Ареспубликаҟны аԥснытәии урыстәылатәии анаплакыҩцәа ахьчареи адгылареи рыҭара".
Лара иазгәалҭеит аиҿкаарақәа, аиқәшаҳаҭра знапы аҵазҩыз, дасу ишрымоу алшарақәа аинвестициатә ҭагылазаашьа аиӷьтәразы.
"Ҳалшарақәа ҳаидгыланы рхархәара Аԥсны аҵакырадгьыл аҟны анаплакыҩцәеи аинвесторцәеи аҭагылазаашьа маншәалақәа рзаԥҵара иацхраап ҳәа сгәыӷуеит. Иахьазы иҟоу аҭагылазаашьа уаргәырӷьартә еиԥш иҟам, убри азы ари ахырхарҭаҟны аус рацәаны иутәуп", — лҳәеит лара.
Калиагина иазгәалҭеит Аԥсны иҟоу урыстәылатәи абизнес адгыларатә центр "Аидгылара" аԥҵара хықәкны ишамаз ареспубликаҟны аусура зҭахны иҟоу урыстәылатәи аинвесторцәеи аԥснытәи анаплакуааи ацхыраара рыҭара.
"Ҳара азакәанԥҵара аус адааулалоит, уи адагьы анаплакыҩцәа идҳардырлоит Аԥсны ирыдыркыло азакәанқәа. Хықәкны иҳамоуп урҭ азакәанқәа зегьы еидызкыло апортал аԥҵара", — лҳәеит Ацентр адиректор хада.
Азакәанԥҵара аҿиареи азинтәи аекономикатәи ҭҵаареи Рцентр адиректор Елла Литвинова иазгәалҭеит Аԥсныҟа аинвистициақәа радыԥхьаларазы иахәҭаны ишыҟоу азакәанԥҵаратә шьаҭа еиҿкаа.
"Анормативтәи азакәанԥҵаратәи ҵаҵӷәы аҟамзаара Аԥсныҟа аинвестициақәа раара иаԥырхагоуп. Ҳара иҳаӡбеит ҳамчқәа еилаҳҵарц атәылаҟны аинвестициа аҿиаразы", — лҳәеит Литвинова.
Афонд аԥҵан 2015 шықәса рзы. Иара иахықәкы хаданы ишьоуп анаплакыҩцәа русеицура.
