АҞӘА, жәабран 19 — Sputnik, Роберт Џьапуа. Ареспублика ауааԥсыра рзы афымцамч ахәԥса еиҭакра аиуам, иҳәеит Аԥыза-министр Артур Амқәаб, аԥшьаша, жәабран 18 рзы имҩаԥигоз апресс-конференциаан.
"Урыстәыла аиҳабыра рахь аҳәара ҟасҵеит ацхыраара ҳарҭарц. Имҩаԥгаз аконсультациақәа рышьҭахь аиҿцәажәаратә процесс хыркәшахеит. Зегь раасҭа ихадоу афымцарцәара иаҟәыҵуеит, афымцамч ахәԥса шыҟац иаанхоит", — иҳәеит атәыла аиҳабыра рхада.
Иара убасгьы иазгәеиҭеит ареспубликаҟны афымцамч ахархәара жәантә ишазҳаз, ЕгрыГЕС акәзар афымцамч аушьҭрагьы ҳәаак аманы иҟоуп.
Ишдыру еиԥш ЕгрыГЕС аӡеизакырҭаҟны аӡы аҩаӡара ахьылаҟәыз иахҟьаны ажьырныҳәа 25 инаркны ареспубликаҟны афымца аамҭа-аамҭала идырцәон. Арҭ аркьаҿрақәа аԥырхит жәабран 16 рзы. Аԥсныҟа афымцамч аашьҭра иалагеит Урыстәылатәи Афедерациа.
