АҞӘА, жәабран 19 — Sputnik, Роберт Џьапуа. 2016 шықәса рзы ихацыркхоит анапхгараҟны иҟоу аусзуҩцәа рҵара апрограмма. Абри атәы иҳәеит Аԥыза-министр Артур Амқәаб имҩаԥигоз апресс-конференциаҟны.
Аминистрцәа Реилазаара алахәылацәа рхы аладырхәраны иҟоуп анапхгараҟны иҟоу аусзуҩцәа рҵара апрограмма ҷыда. Иара аусура иалагоит 2016 шықәса лаҵарамза 16 инаркны. Апрограмма анагӡараҟны ацхыраара ҟарҵоит Урыстәыла жәлар рынхамҩеи Урыстәыла Апрезидент иҟны иҟоу аҳәынҭқарратә маҵзуреи ракадемиа аректор Владимир Мау, ҳџьынџьуаҩ – Игорь Барцыц, иҳәеит Аԥыза-министр.
"Апрограмма иаҵанакуеит аҵаратә семестрқәа ԥшьба: хԥа араҟа имҩаԥгахоит, акы – Москва. Апрограмма иазыԥхьагәанаҭоит аҟазара аизырҳара. Иҟоуп иара убасгьы аҿар рзы, иминистрхар зҭаху рзы апрограмма. Ари зегьы хәыдаԥсадоуп", — иҳәеит Аԥыза-министр.
Апресс-конференциа амҩаԥгараан Артур Амқәаб иҳәеит Урыстәыла иҳанаҭо афымцамч ахәԥса шыҳаракымхо.
