АҞӘА, жәабран 19 — Sputnik, Бадраҟ Аҩӡба. Аԥсны Агәабзиарахьчара аминистр Андзор Гоов ахәаша, жәабран 19 рзы имҩаԥигоз апресс-конференциаҟны иазгәеиҭеит аимҳәачымазара акыр еиҵахеит ҳәа.
"Агәабзиарахьчара аминистрра ажәалагалала иҟаз акарантин алҵшәақәа аиуит. Аимҳәачымазара зыхьуа рхыԥхьаӡара акыр еиҵахеит. Ачымазцәа зегьы хәшәыла реиқәыршәара алыршахеит. Иҟаз аҭагылазаашьа лыԥхала ҳалҵит ҳҳәартә иҟоуп", ҳәа азгәеиҭеит аминистр.
Аминистр иажәақәа рыла Гал араион аҟны акарантин иацҵоуп.
"Гал араион аҟны акарантин аҿҳәара иацҵан аҵыхәтәантәи аамҭазы ачымазцәа рхыԥхьаӡара ахьеизҳаз инамаданы".
Акарантин рылаҳәан ажьырныҳәа 26 инаркны жәабранмза 15 рҟынӡа.
