Акандидатцәа ралхразы 33 гәыԥ ҭаҩуп

© SputnikПаспорта гражданина Абхазии и РФ.
Паспорта гражданина Абхазии и РФ. - Sputnik Аҧсны
Анапаҵаҩра
НовостиTelegram
Аҟәатәи алхратә еилакы аҟны имҩаԥысуеит Аҟәатәи ақалақьтә еизарахь акандидатцәа ралхразы аԥшьгаратә гәыԥқәа рҭаҩра, иахьазы иҭаҩуп 33 гәыԥ.

АҞӘА, хәажәкыра 1 — Sputnik, Асҭанда Арӡынԥҳа. Аҟәатәи алхратә еилакы аҟны имҩаԥысуеит Аҟәатәи ақалақьтә еизарахь акандидатцәа ралхразы аԥшьгаратә гәыԥқәа рҭаҩра. Иахьазы иҭаҩуп 33 гәыԥ. абри атәы ҳкорреспондент илалҳәеит Аҟәатәи алхратә еилакы амаӡаныҟәгаҩ Мадонна Кәыҵниаԥҳа.

Лара иазгәалҭеит "Аҭыԥантәи ахаланапхгараҭаратә органқәа рахь алхрақәа рзы" азакәан инақәыршәаны аинциативтә гәыԥ азин амоуп кандидат заҵәык иалхра.

"Абасала иахьазы 33 гәыԥ ашәҟәы иҭаҩуп. Хәажәкыра 14 инаркны иалагоит акандидатцәа рҭаҩра", — лҳәеит лара.

Аизарахь акандидат иалхразы иахәҭаны иҟоуп хәҩык иреиҵамкәа злахәу аԥшьгаратә гәыԥ аԥҵара. Иарбоу агәыԥ алхратә еилакы аҟны ашәҟәҭаҩра иахрыжьуеит.

Кәыҵниаԥҳа лажәақәа рыла акандидатцәа рхала ирыӡбоит иарбан округу рхы ахьықәдыргыло.

"Округқәак рҟны хәҩык рҟынӡа ахьықәгылоу ыҟоуп. Иҟоуп аокруг – фҩык акандидатцәа ахьықәгылоу. Ауаа еиҳарак дара ахьынхо араион аҟноуп иахьықәгылоу. Еиҳа ибзианы иахьырдыруа", — лҳәоит Кәыҵниаԥҳа.

Хәажәкыра 14 инаркны 24 рҟынӡа аҳҭнықалақь аҟны имҩаԥгахоит ақалақьтә еизарахь адепутатцәа ашәҟәы рҭагалара.

Алхрақәа мҩаԥысраны иҟоуп 2016 шықәса мшаԥымза 3 рзы. Аҟәа иаԥҵахоит 26 алхратә округ.

Алхрақәа мҩаԥысраны иҟан 2016 шықәса жәабранмзазы, аха Рауль Ҳаџьымба иажәалагалала мшаԥымзахь ииаган.

Ажәабжьқәа зегьы
0