Аныҳәа азгәарҭеит атеатртә қәгыларақәеи, ахәмаррақәеи, ашәақәеи, акәашарақәеи рыла.
Ауаажәларратә еидгыла "Русское содружество" ахантәаҩы Елена Астапенко лажәақәа рыла асеиԥш иҟоу ауснагӡатәқәа ауаа еидыркылоит.
Новосибирсктәи Аԥсны асас Миролиуба Савенцева илҳәеит аурыс обшьчина атәым ҳәынҭқарраҟны еиҿнакааз аныҳәа гәахәарыла лхы шалалырхәыз.
"Даара сгәы иаахәеит атәым ҳәынҭқарраҟны аурыс культура аҟәырҷаха ахьызбаз. Даара аамҭа лахҿыхны иаҳхаагеит. Иаадыруаз ауаагьы ҳԥылеит. Ауснагӡатә угәы шьҭнахыртә имҩаԥысит", — лҳәеит Савенцева.
Аныҳәа алахәыла Дариа Сибирева иазгәалҭеит аныҳәа агәалаҟазаара ду шлызцәырнагаз.
"Аныҳәа даара угәы ҟанаҵон. Апрограмма акыр иинтересын", — лҳәеит лара.
"Масленица" ижәытәу славиантә ныҳәоуп. Аԥсабара аира, аиҭаҿиара иасимволуп, амарҭаҭтә культурахь иаҵанакуеит, аха ақьырсианра Урыстәыла ианаднакыла ашьҭахьгьы ишыҟаз иаанхеит. Аха уажәы, Ачгара ду иаԥхьанеиуеит, иара арыцхәгьы иадҳәалоуп.
