АҞӘА, хәажәкыра 12 — Sputnik, Роберт Џьапуа. Аԥсны иреиҳау аӡиас Кәыдры иаԥну ақыҭақәа ирыҵалар алшоит ианаамҭоу аусмҩаԥгатәқәа ҳадҳамкылар ҳәа ишьоит, Аԥсны аекологиеи аԥсабара ахьчареи рзы аҳәынҭеилакы аиҳабы Савели Ҷыҭанаа. Уи азы аӡиас аҟәарақәа рӷәӷәатәуп.
"Аусурақәа иаарласны имҩаԥаҳамгар, аӡы хыҵны иаԥну ақыҭақәа ирыҵалар алшоит. Абри аганахь ауп афымцацәаҳәақәагьы ахьиасуа. Схаҭа избеит урҭ рышьаҟақәа аӡы ишӡаагылоу. Аӡы 20 сантиметра ишьҭыҵхьеит. Амшқәа ԥхаррахеит, асырӡ алеира иалагеит. Кациқыҭ ашәарҭа иҭагылоуп", — иҳәеит Ҷыҭанаа.
Аеколог иажәақәа рыла афинанстә цхырааразы атәыла анапхгара рахь аҳәара ҟаиҵахьеит, аха макьаназы аԥаразоужьра мҩаԥгам.
"Сгәыӷуеит аԥарақәа ԥшаахоит, аусурақәагьы ианаамҭо имҩаԥгахоит ҳәа", — иҳәеит Ҷыҭанаа.
"Кәыдры ааԥынтәи аӡлеира акыр ишәарҭоуп. Иара шьхаӡиасуп. Асырӡ анацлалак ҩ-метрак рҟынӡа ишьҭыҵуеит. Иахәҭоу уажә иҟаҳамҵар аҳаиртә баӷәазагьы ашәарҭара иҭагылоит", — иҳәеит аеколог.
Кәыдры ахы ыҵнахуеит Кавказтәи ашьхеибаркыра ду аҟны. Аура шә-метрак еиҳауп. Аԥсны зегь раасҭа ӡыла иҭәуп ҳәа иазшьоуп, иреиҳау аӡиасқәа иреиуоуп.
