АҞӘА, хәажәкыра 24 — Sputnik, Асҭанда Арӡынԥҳа. 2016 шықәса хәажәкыра 23 рзы изаамҭанытәиз Женеватәи аиԥыларақәа раан аганқәа алацәажәеит аекологиатә ҟазшьа змоу азҵаарақәа, акультуратә ҭынхақәеи архивтә документқәеи рырхынҳәра, иара убасгьы Галтәи аиԥыларақәа еиҭахацыркхарц. Абарҭ ртәы ҳаиҳәеит Адәныҟатәи аусқәа рминистр Виачеслав Чрыгба.
"Аиԥыларақәа ирылдыршоит иахьа аҭыԥ зманы иҟоу ацәгьоурақәа ирҿагылан ақәԥара. Аҳәаа иахьаԥну ацәгьара ҟазҵаз егьи аган ахь ииасуеит ҽыҵәахра ҳәа. Абарҭ ацәгьоуцәа рганахьала аинформациа аимдара аганқәа рыҩбагь рзы лҵшәа злоу акоуп", — иҳәеит Чрыгба.
Иара иажәақәа рыла Галтәи аиԥыларақәа ирылахәхоит аԥснытәии урыстәылатәии аҳәаахьшьцәа.
Аминистр иара убасгьы иазгәеиҭеит аиҿцәажәара алахәылацәа агуманитартә аспект азхьаԥшра шарҭаз. Аԥсуа ган ажәалагала ҟанаҵеит Аԥсни Аахыҵ Уаԥстәылеи ртәылауаа ртәылақәа рынҭыҵ рхы иақәиҭны аныҟәара азин роурци арҭ атәылақәа рдокументқәа разхаҵарази.
"Женеватәи аиҿцәажәарақәа рыцхантәаҩцәа, ЕС, ОБСЕ, ООН рхаҭарнакцәа арҭ азҵаарақәа рылацәажәара иадгылеит. Дара иазырыԥхьаӡоит арҭ азҵаарақәа Аԥсни Аахыҵ Уаԥстәылеи рзы акыр рыҵаркуа иҟоуп ҳәа. Егьырҭ араундқәа раангьы урҭ ирыцҵатәуп ҳәа", — иҳәеит аминистр.
Аиԥылараан иара убасгьы аганқәа алацәажәеит аекологиатә ҟазшьа змоу азҵаарақәа, акультуратә ҭынхақәеи архивтә документқәеи рырхынҳәра. Иааидкылан аԥсуа ган аилацәажәара амҩаԥысшьа агәахәара рнаҭеит.
