АҞӘА, хәажәкыра 24 — Sputnik. Аидысларақәа раԥырҟәҟәареи рызхьаԥшреи рзы Амеханизм аиҭахацыркра Женеватәи аиҿцәажәарақәа ирылҵшәа бзианы иҟалеит, иҳәеит ҳкорреспондент диҿцәажәо Аԥсны Адәныҟатәи аусқәа рминистр ихаҭыԥуаҩ Кан Ҭаниа.
"Иуҳәар ауеит Аидысларақәа раԥырҟәҟәареи рызхьаԥшреи рзы Амеханизм арегион аҟны аҭагылазаашьа аҭышәынтәалара азҭо факторуп ҳәа", — иҳәеит Ҭаниа.
2009 шықәса рзы Женеватәи аиҿцәажәарақәа раан ирыдкылан Аидысларақәа раԥырҟәҟәареи рызхьаԥшреи рзы Амеханизм азы адокумент. Аха аамҭақәак рышьҭахь европатәи ахылаԥшцәа Рмиссиа ахада, аинрал Тишкевич иҳәамҭақәак рҭакс аԥсуа ган иара "персона нон грата" ҳәа дрыԥхьаӡеит.
Иҟан иара убасгьы еиуеиԥшым атехникатә ҟазшьа змаз аилибамкаарақәа, урҭ инарыдҳәаланы Галтәи амеханизм аанкылан.
"Изаамҭанытәиу араунд аан аганқәа аҽазныкгьы абри адокумент иазыхынҳәит" — иҳәеит Ҭаниа.
Аидысларақәа раԥырҟәҟәареи рызхьаԥшреи рзы Амеханизм аиҭахацыркразы Аиқәшаҳаҭра алыршахеит Женева хәажәкыра 22-23 рзы имҩаԥысуаз аиԥыларақәа раан.
