АҞӘА, хәажәкыра 25 — Sputnik, Асҭанда Арӡынԥҳа. Лаҵарамза 28 рзы Аԥсны аҳҭнықалақь Аҟәа иаатраны иҟоу, ашьапылампыл азы адунеи ачемпионат ахәмаррақәа рыӡбразы Аԥсныҟа иааԥхьоуп Урыстәылатәи арбитрцәа 16-ҩык. Абри атәы ҳкорреспондент илеиҳәеит Аԥсны ашьапылампыл Афедерациа ахада Руслан Аџьынџьал.
"Аԥсны иахәҭоу аӡбаҩцәа ҳамам. Абри азҵаараҟны апроблема дуны иҳамоуп. Урыстәыла аҳәара аҳҭеит. Аиҿцәажәарақәа цоит. Азҵаара хра аманы иӡбхоит", — иҳәеит Аџьынџьал.
Иара иажәақәа рыла абилеҭқәа рыҭира иаламгацт. Акассақәа анаадыртуа арыцхә хазы ирылаҳәахоит.
"Ашьапылампыл Аԥсны атәылауаа аамҭақәак рзы акәзаргьы аполитика рханаршҭуеит. Ҳара иаҳҭахуп ҳажәлар еидызкыло џьара акы. Ачемпионатгьы убри иаҩызоу уснагӡатәуп. Зегьы ҳгәы арҿыхоит, агәырӷьара ҳнаҭоит. Зегь раасҭа ихадоу ҳҿар, ашьапылампыл бзиа избо рылала ирбоит ачемпионат ахәмаррақәа", — иҳәеит иара.
Ачемпионат ахәмаррақәа хацнаркуеит 2016 шықәса лаҵарамза 28 рзы, Аҟәатәи астадион "Динамо" аҟны. Афинал арыцхә ҳәа ишьақәыргылоуп рашәарамза 5. Атурнир иалахәхоит 12 команда.
