АҞӘА, хәажәкыра 29 — Sputnik, Роберт Џьапуа. Ихацыркуп Ареспубликатә трасса Аҟәа-Очамчыра аремонт. Иара инагӡаны аиҭашьақәыргылара иартәараны иԥхьаӡоуп 386 миллион мааҭ. Абри атәы иҳәеит Аҳәынҭеилакы "Аԥсныавтомҩа" анапхгаҩы Борис Ачба.
"Амҩа ахәҭа 48 километра иҟоуп. Асметатә хәыԥса иартәоит 386 миллион мааҭ. Арахь иаҵанакуеит амҩа акаҭраныркра, аганқәа разыԥхьагәаҭара, амҩатә дыргақәа рықәыргылара. Ихҳаркәшараны иазыԥхьаӡоуп абҵара-ԥхынҷкәын, аха аамҭа иҳанаҭар заагьы ҳалгоит. Аремонт мҩаԥгахоит урыстәылатәи афинанстә цхыраара аҳәаақәа ирҭагӡаны", — иҳәеит Ачба.
Аҳәынҭеилакы аиҳабы иажәақәа рыла асметатә документациаҟны иазыԥхьагәаҭоуп 6 сантиметрак иҟоу акаҭран ақәҵара, ҭыԥқәак рҟны иара аҿыгҳара 15 сантиметра инаӡоит. Амҩа аҭбаара 9 метрак инаӡоит.
"Еилкаауп аҩбатәи аҿысҭы ықәҵазар шыбзиаз, аха усҟан ахәԥса еиҳа еиҳахоит. Ишалшо ала аусурақәа рхаҭабзиара ҳашьклаԥшуеит", — иҳәеит Ачба.
Борис Ачба иазгәеиҭеит аусурақәа шымҩаԥнаго Гәдоуҭатәи амҩа-ргыларатә комбинат.
"Иахәҭоу атехника, алабораториа ҳамоуп. Акаҭран Баӷмаран иҟарҵоит. Уаҟа амыруга ҿыц ықәгылоуп, сааҭк ала 240 тонна аилазаара аунашьҭуеит", — иҳәеит иара.
Ачба иазгәеиҭеи 2016 шықәса рзы 16 обиект аремонт рзырураны ишыҟоу. Урҭ рҟынтәи 9 рремонт анагӡарахь инеиуеит. Иааидкыланы амҩақәа рремонт азы сынтәа 600 миллион мааҭ азоужьуп.
"Гал араион ҵаҟатәи азонаҟны амҩа иаҿуп. Аҟәа ақалақь амҩақәа хԥагьы нап дыркуп. Гагратәи араион аҟны амҩақәа хԥа, Тҟәарчал араион аҟны амҩақәа хԥа, Очымчыра ақалақь аҟны мҩак, Очымчыреи Гәылрыԥшьи араионқәа рҟны акака мҩа аремонт рызууп. Ҽааны ҳалагоит аӡиа Риҵахь узго амҩа ахәҭак аремонт азура", — иҳәеит иара.
Иара убасгьы иазгәеиҭеит ареспубликатә мҩаду ахәҭа Ԥсоу-Аҟәа алашара аус адулара ишаҿу.
