АҞӘА, хәажәкыра 30 — Sputnik, Бадраҟ Аҩӡба. Ахақәиҭра апарк аҟны хәылԥазыла изырлашоз алашарбагақәа рыхәҭак рӷьычит, рыхәҭак ԥырҽит, ҳәа ҳалҳәеит Аҟәа Ахадара акоммуналтә Усбарҭа аиҳабы Елена Атепина.
"Аҵыхәтәантәи аамҭақәа рзы ақалақь аҟны авандализмра ахҭысқәа рацәахеит. Аҽакала исзазҳәом имҩаԥысуа. Апарк аҟны имҩаԥысуаз аусурақәа зегьы ақалақьуаа рхарџьала ауп ишымҩаԥгаз. Ари згәамԥхо џьоук ыҟазаап", — лҳәеит лара.
Ахақәиҭра апарк аҟны хәылԥазыла изырлашоз алашарбагақәа рыхәҭак ӷьычуп, рыхәҭак ԥҽуп.
"Ақалақь еиуеиԥшым аҭыԥқәа рҟны атәарҭақәа роума агәамҭаԥсарҭақәа роума – иԥырҽуеит, ирҟәаҟәоит. Афуникулиор аҟны аколоннада арԥшӡара ҳгәиҭан аԥхынразы, аха џьоукы иԥырыҽҽуеит. Ак аҟаҵаразы унапы шьҭымҵуа рхы мҩаԥыргоит. Ҳақалақь ҳара бзиа иҳамбар, избода", — лҳәеит лара.
2015 шықәса нанҳәамзазы Ахәаахәҭра-ааглыхратә Палата ишьаҭанаркит Аҟәа, Ахақәиҭра апарк аиҭашьақәыргыларазы Афонд. Цәыббра 25 рзы имҩаԥган агәыҳалалратә марафон.
Еизгаз аԥарақәа рыла 900 м/ԥшь. атротуартә плитка шьҭаҵан, ацәымзаркыгақәа ықәыргылан.
