АҞӘА, мшаԥы 1 — Sputnik, Асҭанда Арӡынԥҳа. АУН "Зеленое хозяйство" нап анаркит аҳҭнықалақь аҟны изаамҭанытәиу асанитартә усурақәа рымҩаԥгара – аҵлақәеи ачықьқәеи рхыҵәҵәара.
Аусурақәа еснагь еиԥш имҩаԥысуеит ааԥын.
Аҵлақәа рырҟәыдра аҭахуп асанитартә нормақәа ирықәныҟәаны, ишахәҭоу еиԥш еилыхтәуп – иҩоуи ичмазаҩуи амахәқәа ԥыҟҟалатәуп. Уи аҵла ԥхьаҟатәи аҭагылазаашьа иахәоит, еизнарҳауеит.
Иахьазы аҵлақәеи ачықьқәеи рхыҵәҵәара хацдыркит Ешба имҩаҟны, иацҵахоит Кәыдрытәи амҩаду аҟны. Арҭ амҩадуқәа рҟноуп иахьиасуа атроллебустә цәаҳәақәа, изызҳаз амахәқәа урҭ рныҟәара аԥырхага арҭоит.
"Аусурақәа ҳарҿуп. Амшцәгьақәа раан иаанаҳкылоит. Ашәарҭадара атехника инақәыршәаны ақәоурақәа раан асеиԥш иҟоу аусурақәа рымҩаԥгара ҟалом", — иҳәеит АУН ахаҭарнак.
Аусурақәа мҩаԥнагоит бригадак, аа-ҩык злахәу. Ашьыжь асааҭ 9 инаркны ахәылбыҽха асааҭ 5 рҟынӡа аус руеит.
"Ешба имҩаҟни Кәыдрытәи амҩаду аҟни ауп иахьиасуа атроллебустә цәаҳәақәа, изызҳаз амахәқәа урҭ рныҟәара аԥырхага арҭоит. Лассы-лассы ирҟәыдлатәуп урҭ амҩақәа рҟны игылоу аҵлақәа", ҳәа азгәеиҭеит аусуҩ.
Аҭыԥантәи ауааԥсыра арҭ аусурақәа гәахәарыла ирыдыркылоит. Урҭ руаӡәк иазгәалҭеит амахә ҩақәа афымцатә цәаҳәақәа рҟынгьы ихыжәжәаны ишыхшьлоу, ашәарҭаратә ҭагылазаашьа шаԥырҵо.
Аҟәа ақалақь Ахадара Акоммуналтә нхамҩа аусбарҭа аиҳабы Елена Атепина лажәақәа рыла асеиԥш иҟоу аусурақәа есышықәса имҩаԥыргоит.
"Ақалақь амҩадуқәа зегьы рҟны асеиԥш аусурақәа мҩаԥгалатәуп. Аха, еснагь еиԥш аԥара азхом", — лҳәоит лара.
Лара иара убасгьы иҳалҳәеит ашәҭқәа реиҭаҳара шхацдыркыз.
"Ацҳа ҟаԥшь аҟни Леон имҩаду аҟни ашәҭқәа еиҭаҳҳаит. Ақалақь ауааԥсыра рахь аҳәара ҟасҵоит – ашәҭқәа ирыламкьысларц, иҵхны икармыжьларц, мамзаргьы иӷьычны ирымгаларц", — лҳәеит лара.
