АҞӘА, мшаԥымза 4 — Sputnik. Ермантәылеи Азербаиџьани адырра ҟарҵоит аҭагылазаашьа ӷыӷкит ҳәа. Азербаиџьан Атәылахьчара аминистрра аҳәамҭа ҟанаҵеит Ермантәыла Арбџьар мчқәа рганахьала ахысрақәа мҩаԥысуеит ҳәа. Иара убри аан Ермантәыла арратә усбарҭа иазгәанаҭоит азербаиџьантәи аган ауп ақәлара ҟазҵаз ҳәа.
"Ермантәыла Арбџьартә мчқәа уахыки-ҽнаки рыла 127-нтә амца аанкылара арежим еиларгеит", ҳәа аҳәоит Азербаиџьан Атәылахьчара аминистрра аҳәамҭаҟны.
Иара убасгьы аҳәамҭаҟны иазгәаҭоуп аминомиотқәеи апулимиотқәеи ахархәара рымоуп ҳәа.
Ашьха Ҟарабахтәи Ареспублика ар рпресс-маҵзураҟны иазгәаҭоуп азербаиџьантәи аган артиллериа, атанкқәа, авиациа ахы ианархәеит ҳәа.
Ашьха Ҟарабах иахҟьаны Ермантәылеи Азербаиџьани рыбжьара бџьаршьҭыхлатәи аиҿагылара ахы акит 1988 шықәса рзы, жәабранмзазы. Усҟан Ашьха Ҟарабах Азербаиџьан иалҵырц иқәгылеит. 1991 шықәса рзы ирылаҳәан Ашьха Ҟарабахтәи Ареспублика аԥҵоуп ҳәа.
1992 шықәса рзы ихацыркхеит аимак ҭынчымҩала аҭыԥ ақәҵаразы аилацәажәарақәа.
