АҞӘА, мшаԥымза 6 — Sputnik, Саид Барганџьиа. Жәларбжьаратәи афольклортә кәашарақәа рконкурсқәа рлауреат, жәлар рыкәашара академиатә ансамбль "Нальмес" гостроль ҳасабла Аԥсны иаҭааны иҟоуп. Ансамбль аиубилеитә тур хацнаркит Аԥсны. Атур аҳәаақәа ирҭагӡаны имҩаԥнагеит актәи аконцертгьы.
Аԥсны Акультура аминистр Ельвира Арсалиаԥҳа иазгәалҭеит атәыла акультуратә ԥсҭазааразы "Нальмес" аара акраҵанакуа иҟоуп ҳәа.
"Нальмес" аиубилеитә тур акраамҭа ҳазыԥшын. Аԥсны ансамбль бзиа избо рыдагьы иазыԥшын иара аколлегацәа, артистцәа. Аҟәеиԥш егьырҭ Аԥсны ақалақьқәа рҟынгьы имҩаԥысраны иҟоуп аконцертқәа", — лҳәеит аминистр.
Адыга жәлар рыкәашара аҳәынҭқарратә академиатә ансамбль "Нальмес" аԥҵан 1936 шықәса рзы. 2016 шықәса жьҭаарамзазы иара иахыҵуеит 80 шықәса.
Ансамбль иалахәылоуп 70-ҩык артистцәа. Асахьаркыратә напхгаҩыси абалетмеистер хадаси дыҟоуп Адыгатәи Ареспубликаҟны зҽаԥсазтәыз артист Аслан Хаджаев.
