АҞӘА, мшаԥымза 26 — Sputnik, Астанда Арӡынԥҳа. Аиааира амшныҳәа ду иазку маланыҟәала аиԥхныҩлара Гәылрыԥшь-Аҟәа алахәылацәа аҭаараны иҟоуп Гәылрыԥшьтәи Аҟәатәи араионқәа ргоспитальқәа рҟны ироуз ахәрақәа ирыхҟьаны зыԥсҭазаара иалҵыз асовет еибашьцәа рыжырҭа аҭыԥқәа.
Аԥсны иҟоу Россотрудничество ахаҭарнакраҟны ишҳарҳәаз ала маланыҟәала аиԥхныҩлара Гәылрыԥшь-Аҟәа алахәылацәа аҭаараны иҟоуп Гәылрыԥшьтәи Аҟәатәи араионқәа ргоспитальқәа рҟны ироуз ахәрақәа ирыхҟьаны зыԥсҭазаара иалҵыз асовет еибашьцәа рыжырҭа аҭыԥқәа, амемориалқәа рҟны ашәҭқәеи ашәҭшьыҵәрақәеи шьҭарҵоит.
"Акциа рхы аладырхәыр алшоит изҭаху зегьы. Ҳара ари аҩыза акциа ҵыԥхгьы имҩаԥаагеит", ҳәа ҳарҳәеит ахаҭарнакраҟны.
Маланыҟәала аиԥхныҩлара азырхоуп Аиааира 71 шықәса ахыҵра амшныҳәа. Иара еиҿнакаауеит Аԥсны иҟоу Россотрудничество ахаҭарнакра.
Аџьынџьтәылатә еибашьра ду иалахәын 55 000-ҩык Аԥсны ауааԥсыра, урҭ рҟынтәи 17 430-ҩык рыԥсадгьыл рхы ақәырҵеит. Ареспублика атәылауаа 22-ҩык Асовет Еидгыла афырхаҵа ҳәа ахьӡ ду иаԥсоуп.
