АҞӘА, лаҵарамза 6 – Sputnik, Роберт Џьапуа. Косово Ашьапылампыл азы жәларбжьаратәи Афедерациа (ФИФА) иаларҵар, Аԥсынгьы абри аиҿкаарахь ирыдыркылар алшоит,ҳәа агәыӷра ҳнаҭоит, ҳәа ҳкорреспондент иеиҳәеит Ашьапылампыл азы Аԥсны афедерациа апрезидент Руслан Аџьынџьал.
"Мраҭашәаратәи жәларбжьаратәи аилазаара ҳтәыла иахьатәи аҭоурых аганахьала имҩаԥырго ҩ-ганклатәи астандартқәа ирыцәхьаҵны аспорти аполитикеи реиҟәыгара рылшап ҳәа агәыӷра сымоуп, ажәаҟны акәымкәа аус аҟынгьы", — иҳәеит Руслан Аџьынџьал.
Иара убри аан иҳәеит дшеигәырӷьо Косово абри аиҿкаарахь ирыдыркылар.
Европатәи ашьапылампылтә ассоциациақәа Рхеидкыла (УЕФА) аконгресс алахәылацәа 2016 шықәса лаҵарамза 3 рзы рыбжьы рҭиит аиҿкаара иалагалахарц Косово ашьапылампыл Афедерациа.
Аконгресс аилатәара мҩаԥысуан Будапешт. 28 тәыла абри ажәалагала иадгылеит. 24 тәыла – мап ацәыркит. Абыжьқәа ҩба азырымԥхьаӡеит.
