АҞӘА, лаҵарамза 12 — Sputnik, Бадри Есиава. Гәдоуҭа араион аиланхарҭа Дружбаҟны инхо Гәдоуҭатәи агәамкаԥсарҭахь амҩа ркит, аҩашаҽны. Араион анапхгареи дареи еилацәажәеит амшын иазааигәоу агәамкаԥсарҭа полигон арҭбаара аанкылахарц. Абри атәы иҳәеит Гәдоуҭа араион Ахада ихаҭыԥуаҩ Даур Ӡиӡариа.
"Аполигон џьаргьы иаҳзиагаӡом. Иалшо акы заҵәык ауп: иҟоу аҭыԥ аҟны ишахәҭоу еиԥш ацрыҵқәа реизгара", — иҳәеит Ӡиӡариа.
Араион ауааԥсыра аполигон ауаа ргәабзиареи аԥсабареи ирԥырхагоуп ҳәа иршьоит. Уи адагьы иара акыр аҽарҭбааит.
"Даара ҳҽаҳшәахьеит аха еиӷьхарак, цхыраарак ыҟам. Ҩышықәса раԥхьагьы абри азҵаара шьҭаҳххьан", — иҳәеит Дружба инхо Лавренти Феҭ-оӷлы.
Аԥсны аекологиеи аԥсабарахархәареи рзы аилак ахантәаҩы Роман Дбар иазишьоит аполигон ахылаԥшра аҭалатәуп ҳәа анхара-коммуналтә нхамҩақәа рганахьала.
Гәдоуҭа араион Ахадара рхы иадырҵеит иаарласны агәамкаԥсарҭа аиҿкааразы атехника шаашьҭхо азы.
