АҞӘА, лаҵарамза 17 – Sputnik, Бадри Есиава. Ашәахьа ашьыжь иалагаз ақәаршҩы ӷәӷәа Гәдоуҭатә араионтә хәышәтәырҭа ихышхыҵәаны иаҵалеит. Ашҭеи аподвалқәеи ӡыла иҭәит. Абри атәы ааицҳаит ахәышәтәырҭа аҳақьым хада Ҳаџьараҭ Шамба.
Иара иажәақәа рыла ари зыхҟьаз адренаж система ииашамкәа иахьеиҿкаау ауп.
"Аподвал ахь аӡы алеира ныҭкааны иҭҵаам ааха изыхҟьо ҳәа иҟоу агәаанагара адренаж система аиқәымшәароуп. Араион аиҳабыра ацхыраара шәаҳҭоит рҳәеит, ҳаԥшуп", — иҳәеит иара.
Араионтә хәышәтәырҭа 1973 шықәса рзы идыргылеит. 2011 шықәса рзы аиҭашьақәыргыларатә усурақәа ирылагеит.
2015 шықәса рзы аусурақәа хыркәшан.
