АҞӘА, лаҵарамза 17 — Sputnik, Бадрак Аҩӡба. Ареспубликаҟны ирыдыркыло азакәанқәа зегьы Ауаажәларратә палатаҟны аекспертиза иахыслароуп, лҳәеит Ауаажәларратә палата ахантәаҩы Наҭелла Акаԥҳа, аҩаша, лаҵарамза 17 рзы Аԥсни Свердловтәи аобласти Руаажәларратә палатақәа рхаҭарнакцәа реиԥылараан.
"Свердловсктәи аобласт аҟны абасеиԥш иҟазар, ҳара ҳҟны изыҟамларызеи?", — ҳәа азылыԥхьаӡоит Акаԥҳа.
Лара далацәажәеит анхарҭаҭыԥқәа рыҭира иазку азакәан апроект ицәырнагаз ацәажәарақәа ҟамлар алшон ҳәа иара уаанӡа Ауаажәларратә палатаҟны иалацәажәазар.
Свердловтәи аобласт Ауаажәларратә палата ахантәаҩы Владимир Винницки иазгәеиҭеит Аԥснытәи рколлегацәеи дареи русеицура хымԥадатәины ишибо.
Иара иҳәеит иара убасгьы Ауаажәларратә палатақәа рроль аҵак ду шамоу абизнеси аҳәынҭқарреи русеицураҟны.
Аԥсни Свердловтәи аобласти Руаажәларратә палатақәа ашәахьа, лаҵарамза 16 рзы аусеицуразы Аиқәшаҳаҭра рнапы аҵарҩит.
