АҞӘА, лаҵарамза 19 – Sputnik. Жәларбжьаратәи аинформациатә маҵзуреи арадиои Sputnik Аҟәа иаанартит амультимедиатә центр, аинтернет-портали, арадиостудиеи, апресс центри аманы ахаша, лаҵарамза 18 рзы.
Аартра мҩаԥысит Аҟәеи Москвеи рыбжьара авидеоеимадара аформат ала, Урыстәылатәи Афедерациа аимадареи амассатә коммуникациақәеи рминистр ихаҭыԥуаҩ Алексеи Волин далархәны.
"Ареспубликаҟны ҳаамҭазтәи амультимедиатә плошьчадка аартра жәларбжьаратә хҭысны иҟоуп, аԥсуа-аурыс еизыҟазаашьақәа арҿиоит. Аԥсны иаиуеит аҽа ресурскгьы, атәыла аӡбахә иҿыцу аинформациатәи амультимедиатәи форматқәеи рыла адунеи арҳара алзыршо. Sputnik апресс-центр иалшоны иҟалоит иарбанызаалак адунеи аҭыԥ аҟынтәи авидеоеимадара амҩаԥгара, еиуеиԥшым атемақәа рзы он-лаин арежим ала агәаанагарақәа реимдара. Уи иалшоит адиалогтә географиа арҭбаара", иҳәеит Урыстәылатәи Афедерациа аимадареи амассатә коммуникациақәеи рминистр ихаҭыԥуаҩ Алексеи Волин.
"Жәларбжьаратәи аинформациатә маҵзуреи арадиои Sputnik атәыла амедиа-ҵакыраҟны иҟоижьҭеи шықәсык ирықәуп. Абри аамҭала аҳаҭыр змоу ресурсны, зхаҭабзиара ҳараку мультимедиатә контентны ахы аанарԥшит Аԥснеиԥш анҭыҵгьы. Апортал, арадио, апресс-центр еидызкыло амультимедиатә центр еиҳа хра аманы аинформациатә еинырра амҩаԥгара алшоны иҟалоит. Еиуеиԥшым актуалра злоу аҭыԥантәии жәларбжьаратәии азҵаарақәа рзы агәаанагарақәа реимдара арҭбаауеит", — иҳәеит Sputnik Аԥсны анапхгаҩы Инал Лазба.
Аинформациатә портал Sputnik аԥсышәалеи урысбызшәалеи Аԥсны Аҳәынҭқаррарҟны аусура иалагеит 2014шықәса рзы, ԥхынҷкәын. Зҟазара ҳараку ажурналистцәеи аредакторцәеи ркоманда аԥхьаҩцәа ирыднагалоит еиуеиԥшым агәаанагарақәа, адунеитә ажәабыжьқәа. Арадио Sputnik Аԥсны акәзар атәыла аҵакырадгьыл зегьы иахьаҵанакуа арадиодырраҭарақәа мҩаԥнагоит, азыӡырыҩцәа ажәабжь ҿыцқәеи, ауаажәларра-политикатәи акультуратәи тематика иатәу апрограммақәа рыдгало.
Аԥсны Аҳәынҭқарраҟны Sputnik амультимедиатә пресс-центр (Аҟәа, Пушкин имҩа аҩ. 16) – ҳаамҭазтәи мультимедиатә плошьчадкоуп. Ҳаамҭа иақәшәо атехникала еиқәыршәоуп. Иалшоит еиуеиԥшым аформат ала ауснагӡатәқәа рымҩаԥгара адунеи иарбанызаалак аҭыԥ аҟынтәи. Асасцәеи ажурналистцәеи ирыднагалоит апресс-зал, аинформациа адкылареи анашьҭреи рзы аинфраструкттура маншәала, Wi-Fi.
Sputnik (sputniknews.com) — жәабала атәылақәа рҟны амультимедиатә информациатә хабқәа змоу агентроуп. Sputnik ЗО инареиҳаны абызшәақәа рыла асаитқәеи, аналогтәи ацифратәи радиодырраҭарақәеи, асоциалтә ҳақәа рҟны амобилтә цҵақәеи адаҟьақәеи амоуп.
