АҞӘА, лаҵарамза 27 – Sputnik, Бадраҟ Аҩӡба. Аԥшьаша Жәлар Реизараҟны имҩаԥысуаз аилатәараҟны Апарламент аҟны атәыла Ахада ихаҭарнак Дмитри Шамба иҳәеит ажьырныҳәа 1 2020 шықәсанӡа атәылауаҩшәҟәқәеи анхараз азини Аҩныҵҟатәи аусқәа рминистрраҟны ирырҭалароуп ҳәа.
"Апроект иазыԥхьагәанаҭоит "Аԥсны Аҳәынҭқарраҟны аҳәаанырцәтәи атәылауаа рзинтә ҭагылазаашьазы" азакәани "Аԥсны Аҳәынҭқарра алалареи алҵреи рыԥҟарақәа рзы" азакәани", — иҳәеит иара.
Арҭ азакәанқәа азинмчра роур атәылауаҩшәҟәқәеи анхараз азини рыҭара Амиграциатә маҵзурахьы ииасуеит.
Аԥсны Апарламент адепутатцәа актәи аԥхьарала рыбжьы рҭиит "Аԥсны Аҳәынҭқарра азакәанԥҵаратә актқәак аԥсахрақәа ралагаларазы" азакәан апроект азы.
