АҞӘА, рашәарамза 10 — Sputnik, Анжелика Бениаԥҳа. Апроект "Два взгляда, две страны" аҟны Аԥсны цәыргоуп израильтәи афотоҭыхыҩ Лиа Гельдман лырҿиамҭақәа рыла, Израиль акәзар аԥснытәи афотоҭыхыҩ Константин Грецов иаҳирбоит. Ацәыргақәҵа мҩаԥысуеит Тель-Авив, рашәарамза 9 рзы ҳәа ҳзаалыцҳаит ацәыргақәҵа аиҿкааҩцәа ируаӡәку Лаура Тарнааԥҳа.
Тарнааԥҳа лажәақәа рыла арт-проект "Два взгляда. Две страны" – Аԥсни Израильи рыбжьара акультуратә еимдароуп, ҩыџьа афотоҭыхыҩцәа русеицуроуп.
"Афотоҭыхыҩцәа зынӡаск еиԥшым. Асахьақәа анеилаҳхуаз оумашәа иаабон абриаҟара еиԥшымыз ауаа ак шеицырбоз", — лҳәеит Тарнааԥҳа.
Ицәыргақәҵахоит Лиа Гельдман лусумҭақәа 25, Константин Грецов иусумҭақәа 20.
Константин Грецов иҳәеит Тель-Авив ицәыргақәҵахо иусумҭақәа аҵанакуеит уажә аус здиуло асериа "Меланхолиа". Иара иажәақәа рыла урҭ рыхәҭак Аҟәеи Базели иқәдыргылахьеит.
Аиҿкааҩцәа ражәақәа рыла ацәыргақәҵа мҩаԥысуеит мышкы. Иара ахыб аҟноуп иахьықәыргылахо.
"Иформалым аҭагылазаашьа, аҩнхыб, аицәажәарақәа, ахәылԥшәаԥшь аԥылара алашарбага уахьыԥшуа… алашарбага апроект иасимволны иҟоуп. Иара ауаа еиднакылоит гәыӷрак аҳасабала. Иара убасоуп аҟазареи аԥшӡареигьы ауаа шеидыркыло. Алашарбага Аҟәагьы игылоуп, Израильгьы иҟоуп", — лҳәеит аиҿкааҩ.
Апроект актәи аетап, Израильтәи афотоҭыхыҩ Аԥсны лыҟазаара, апроект аӡыргара мҩаԥысит 2015 шықәса, цәыббрамзазы.
