АҞӘА, рашәарамза 10 — Sputnik. Аԥсны Аԥыза-министр Артур Амқәаб Аахыҵ Уаԥстәыла Урыстәылатәи Афедерациа алаларазы имҩаԥнагараны иҟоу ареферендум ахҳәаа азуа иҳәеит, Аԥсны уи амҩа ишықәымло, избанзар "Аԥсны аҽа ҭоурыхуп".
"Цхинвал амотивқәа еилкаауп. Ауаԥсцәа еиҟәшоу жәларуп. Убри азы урҭ ирҭаху аҽеидкылара уаҩы иџьеишьартә иҟам. Ҳара ҳҿы аҽа ҭагылазаашьоуп иҟоу. Ҳара Урыстәыла ҳаҩызаны ҳаҟазар шаҳҭахугьы ҳхьыԥшымра пату ақәаҳҵоит. Уи рхы ақәырҵеит зықьҩыла Аԥсны аԥацәеи аԥҳацәеи", — иҳәеит Амқәаб.
Аахыҵ Уаԥстәыла Урыстәылатәи Афедерациа алаларазы ареферендум мҩаԥысраны иҟоуп 2017 шықәса рзы. Абри азы иахәҭоу ашәҟәқәа рнапы аҵарыҩхьеит Аахыҵ Уаԥстәыла Ахада Леонид Тибилови Апарламент аиҳабы Анатоли Бибилови.
