АҞӘА, рашәарамзаа 15 – Sputnik, Саид Барганџьиа. Искандер иповест иалху аспектакль "О, Марат" аурыс драматә театр асценаҿы иқәдыргылеит жәларбжьаратәи афестиваль аҳәаақәа ирҭагӡаны. Абри атәы аҭыԥ аҟынтәи иаҳзааицҳаит ҳкорреспондент.
Фазиль Искандер иповест "О, Марат!" иалхны МИТРО атеатртә факультет аспектакль-дивертисмент ықәдыргылеит арежиссиорцәа Сергеи Коковкини Анна Родионовои.
Арежиссиор игәаанагарала Фазиль ипроза аекран ахьгьы асцена ахьгьы аиагара алшом.
"Фазиль ипроза еиҭаҳәашьа амам, иара аиумор, аирониа, ахазынарақәа зегьы ыӡуеит аиҭаҳәараан. "О, Марат!" аҟны апроза аԥхьатәины инҳажьит. Маратаагьы хәҩык ҳамоуп, избанзар дарбанызаалак ахаҵа, маҷк акәзаргьы д-Маратуп", ҳәа иҳәоит Фазиль иҩыза.
Марат иромантикатә цәаҩа еиуеиԥшым аҭоурыхқәа ихнарсуеит. Аха абзиабаратә фронт аҟны ииааирақәа «шьа-маҷла» дызрылҵуам. Иаҳҳәп Бериа ибзиабаҩ лзы иара дишьаҭазҩоит. Маратгьы абарҭқәа зегьы ирыхҟьаны ихаҵаратә мчы ицәыӡуа далагоит.
"Ара аирониа, аиумор, адрама – зегьы еилаӡҩоит. Иҟалап дарбанызаалак Аҟәатәи ахаҵа Марат иҟны ихы ибозар" — лҳәоит Искандер иҟазара абзиабаҩ Светлана Хоцаниан.
Аҩбатәи жәларбжьаратәи афестиваль "Стоянка человека" мҩаԥысуеит рашәарамза 13-16 рзы.
Афестиваль аатит Аԥсуа драматә театр аҟны Мадины Аргәынԥҳа лықәыргыламҭа "Ажьақәеи амаҭқәеи" ала.
Рашәарамза 14 рзы Аԥсуа драматә театр аҟны идырбахоит Александр Ширвиндти Михаил Державини ахьыхәмаруа аспектакль ателеверсиа "Привет от Цюрупы!" Иара убри аҽны, ахәылԥаз ахәаԥшцәа ирбоит МИТРО атеатртә факультет аспектакль, Сергеи Коковкин иқәыргыламҭа "О, Марат!".
Актәи афестиваль мҩаԥысит 2015 шықәса рзы. Усҟан афестиваль аҳәаақәа ирҭагӡаны арахь дааит арежиссиор Александр Сокуров. Иара убасҟан иӡырган адунеи абызшәақәа жәпакы рахь еиҭаго Искандер ирҿиамҭақәеи ироман "Сандро из Чегема" швециатәи асахьаҭыхыҩ Мадлен Рук иазлырхиаз аиллиустрациақәеи.
