АҞӘА, рашәарамза 17 – Sputnik, Владимир Бегунов. Ԥсҳәи Гәдоуҭа араиони еидызҳәало ацҳа ҿыц хҵахоит сынтәа иалыршаны. Абри атәы иҳәеит Аԥсны Аҭагылазаашьа ҷыдақәа рзы аминистр Лев Кәыҵниа.
Аԥсны Аҭагылазаашьа ҷыдақәа рзы аминистр Лев Кәыҵниа иажәақәа рыла ацҳа акыр иажәхьан, иԥсахтәны иҟан.
"Ацҳа убриаҟара иажәхьан, зны аԥсыҭбаратә машәыргьы ҟалахьан. Ааигәа Тҟәарчал ацҳа ҳаԥсахуан, атрос бзиақәа амаҳхит. Урҭ уажәы ҳхы иаҳархәоит", — иҳәеит аминистр.
Уажәы иара Москваҟа дцараны дыҟоуп ацҳа аргыларазы аԥышәа змоу анџьныр иаашьҭразы аиҿцәажәарахь.
Лев Кәыҵниа ишиҳәаз ала аргыларазы ахарџьқәа даарак ирацәахоит узҳәом.
