АҞӘА, рашәарамза 20 – Sputnik, Роберт Џьапуа. Аоппозициатә мчрақәа Рыблок имҩаԥнагеит ашәахьа, рашәарамза 20 рзы апресс-конференциа. Араҟа урҭ дҵаны иқәдыргылеит ААР (МВД) аминистр Леонид Ӡаԥшьба иусура иамхра.
Афонд "Апра" аиҳабы Аслан Бжьаниа ахҳәаа аиҭеит асоциалтә ҳақәа рҟны ирыларҵәоу аудионҵамҭа. Уи аҟны аминистр ареферендум абаикот азурахьы аминистрра аилазаара ааиԥхьон. Бжьаниа иҳәеит уи аминистрра аилазаара аларҟәреи аршәареи роуп иаанаго ҳәа.
"Уи аӡәгьы илшом. Аҭагылазаашьа схы иархәаны аминистр иабжьызгар сҭахуп ихала ԥхьатәара дцарц. Уи иашоуп ҳәа сгәы иаанагоит", — иҳәеит иара.
Афонд аиҳабы иазгәеиҭеит Аԥсны Ахадеи апрокуратуреи абри ахҭыс иазхьаԥшып ҳәа агәрагара шимоу.
Аполитикатә партиа “Амцахара” ахада Алхас Кәыҵниа иазгәеиҭеит зыӡбахә ҳәоу аудионҵамҭаҟны Ӡаԥшьба аминистрра аилазаара адагьы урҭ рҭаацәарақәагьы дышрықәмақаруа.
"Аудионҵамҭа иахәаԥшыз ирбоит. Ираҳауеит уи ус шакәу. Шәара шәымацара шәакәым шәҭаацәа рахьтә аӡә днеиргьы дҭаҳхуеит. Нас "абзиараз" ҳәа иаҳҳәоит иҳәоит иара. Уи аҩыза зхы иаҭәазшьо сара дсыздырам", — иҳәеит Кәыҵниа.
Ауаажәларратә еиҿкаара "Кьаразаа", реиҳабы Дмитри Дбар аҳәамҭа ҟаиҵеит асеиԥш атәылауаа иара убасгьы аибашьра аветеранцәа рықәмақарра аӡәгьы азин имам ҳәа.
"Дарбанызаалак ауаҩы ииҳәо азы аҭакԥхықәра идзароуп", — иҳәеит иара.
Аминистр ииҳәаз дақәыӡбеит иара убасгьы аиҿкаара "Аҳәса аполитикаҿы" ахантәаҩы Ирина Агрԥҳагьы.
