ПИЦУНДА, рашәарамза 20 — Sputnik, Саид Барганџьиа. Раԥхьаӡа акәны Пицунда имҩаԥысит жәларбжьаратәи апроект "Салют талантов" аҳәаақәа ирҭагӡаны афестиваль-конкурс "Черноморские легенды". Абри атәы иҳәеит Арҿиаратә еидгыла "Салют Талантов" арт-директор Григори Соловьев.
Соловьев иажәақәа рыла апроект "Салют талантов" адунеи зегь аҟны имҩаԥысуа афестивальқәа рсериоуп. Арахь иаҵанакуеит: Санкт-Петербург, Москва, Казань, Шәача, Париж, Дубаи, Сеул. Шықәсык аҩныҵҟа 60 рҟынӡа фестиваль мҩаԥысуеит.
Григори Соловьев иазгәеиҭеит иарбанызаалак афестиваль актәи аҩаӡара алауреат иоуеит азин Санкт-Петербург имҩаԥысраны иҟоу афиналтә фестиваль ихы алаирхәыр шауа. Уаҟа ԥхьахәк аҳасабала ишьақәыргылоуп 500 нызқь мааҭ аԥара.
"Пицунда — илегендатәу ҭыԥуп. Уаанӡа арахь аара даара иуадаҩын. Уажәы Аԥсни Урыстәылеи реимадарақәа ирылшамҭаны ахәыҷқәа арахь иаагартә аҭагылазаашьа ҳауит", — иҳәеит иара.
Пицундатәи афестиваль "Черноморские легенды" рхы аладырхәит 250-ҩык рҟынӡа ахәыҷқәа, 5 шықәса инаркны 17 шықәса рҟынӡа зхыҵуа.
Икоммерциатәым аиҿкаара "Салют Талантов" афестивальқәеи аконкурсқәеи еиҿнакаауеит 2008 шықәса раахыс.
Иара рҽаладырхәхьеит 70 000-ҩык рҟынӡа аҿар.
