АҞӘА, рашәарамза 27 — Sputnik, Анжелика Бениаԥҳа. ГИТИС абалеттә факультет аушьҭымҭа, Игор Моисеев ихьӡ зху жәлар рыкәашаратә ансамбль алахәыла Ахра Ҭаниа Москва иқәиргылеит идипломтә усумҭа "Миф о семи старцах". Апремиера даара агәыхыҭхыҭра аҵан ҳәа Sputnik иазааицҳаит ахореограф Ахра Таниа.
Арежиссер-ахореограф иазгәеиҭеит апремиера аҽны иусумҭа ахәаԥшра шилымшаз.
"Сгәы сартәомызт. Сшәон ирыдрымкылар, ирзеилымкаар ҳәа. Аха зегь шьахәрала имҩаԥысит. Москва ирацәоуп абри еиԥшқәоу акультуратә уснагӡатәқәа. Исҭахуп Москва инхо аԥсуаа реиԥш ҳаешьаратә жәларқәа рхаҭарнакцәагьы уахь инеилар, культуратә хәышҭаарак еиԥш ҳаиднакылалар", — иҳәеит Ҭаниа.
Москватәи аԥсуа диаспора аиҳабы Беслан Агрба "Миф о семи старцах" классикатә рҿиамҭоуп ҳәа азиҳәеит.
"Исгәаԥхеит. Асценаҿы имҩаԥысуаз зегьы еилукаауан, иудукылон. Ҳәарада аурыс артистцәа ибзиаӡаны ишыкәашозгьы, кавказтәи аҷыдара, адоуҳа аарԥшра рылшом. Уигьы азгәаҭатәуп", — иҳәеит иара.
ГИТИС аҟны ахәаԥшыҩ раԥхьаӡа акәны ибеит аԥсуа легендақәәа шьаҭас измоу абалет, ҳәа дазааҭгылеит арежиссиор Амра Начҟьебиаԥҳа.
"Аспектакль уникалуп. Ахра илшеит аԥсуа кәашара абалет ахь аиагара. Аԥсны ззымдыруагьы иаразнакы абри адунеи датәнатәуан", — лҳәеит Амра Начҟьебиаԥҳа.
Апремиера ашьҭахь еиҿкаан аконцерт. Уа иқәгылеит акәашаратә ансамбль "Асса", Игор Моисеев иансамбль акәашацәа.
ГИТИС абалеттә факультет аушьҭымҭа, Игор Моисеев ихьӡ зху жәлар рыкәашаратә ансамбль алахәыла Ахра Ҭаниа аҵара иҵон СССР жәлар рартист Михаил Лавровски истудиаҟны.
