АҞӘА, рашәарамза 29— Sputnik, Бадраҟ Аҩӡба. Ҟәбантәи аказақцәа рыр Аҟәатәи аҟәша ҷыдаҟны имҩаԥысит изаамҭанытәим аизара. Аизараҟны Ҟәбантәи аказақцәа рыр Аҟәатәи аҟәша ҷыда атаманс далырхит Андреи Чирков.
Аизара иалахәын ареспубликаҟны иҟоу аказақцәа реилазаарақәа, Аԥсуа Иашахаҵаратә уахәама аиҳабы Виссарион Аԥлиа.
"Аказақцәа қьырсиануаауп. Аибашьраан изныкымкәа избахьан урҭ рфырхаҵарақәа. Дара арахь иааит ҳахьчаразы, ҳадгыларазы", — иҳәеит Аԥлиа.
Еизаз рҿаԥхьа дықәгыло атаман ҿыц иҳәеит иусура уаанӡа ари аҭыԥ иахагылаз ауаа имҩаԥыргоз русқәа ирыцызҵо акәны ишышьақәгыло.
"Ихымԥадатәиуп ареспубликаҟны аказақцәа рыҳаракра. Сусура азырхахаоит ҳқьабызқәеи ҳҵасқәеи реизырҳара", — иҳәеит Чирков.
Иара гәҭакны имоуп Аҩныҵҟатәи аусқәа рминистр иԥылара аказақцәа ареспубликаҟны азинеиҿкаара иалахәхарц азы. Иара убасгьы иазгәеиҭеит асоциалтә рыцҳара иҭагылоу рыцхыраара шхацыркхо.
Иқәгылоз зегьы иазгәарҭон Андреи Чирков иҵоуроу иҟазшьа ҷыдақәа.
Андреи Чирков 2004 шықәса раахыс аус иуеит Аԥсны Атәылахьчара аминистрраҟны.
Уаанӡатәи атаман Владимир Москаленкои ихаҭыԥуаҩ Валери Джумиадии Каман ақыҭан иҭахеит жәабранмза 13 2016 шықәса рзы.
