АҞӘА, рашәарамза 29 – Sputnik, Бадраҟ Аҩӡба. Ататриук ихьӡ зху Стамбултәи аҳаирбаӷәазаҟны жәларбжьаратәи атерминали, амашьынақәа рыргыларҭеи, аҩналарҭеи рҟны аԥжәарақәа ҟалеит аҩаша, 22.00 сааҭ рзы. Аԥжәарақәа раан Аԥсны атәылауааи ҳџьынџьуааи рҟынтәи аӡәгьы ԥырхага имоуит ҳәа ааицҳаит Ҭырқәтәыла иҟоу Аԥсны ахаҭарнак Инар Гыцба.
"Ҭырқәтәыла иҟоу аԥсуа культуратә центрқәа рфедерациа адыррақәа рыла иҭахаз рҟынтәи ҳџьынџьуаа уаҩ дыҟам", — иҳәеит иара.
Ҭырқәтәыла иҟоу аԥсуа культуратә центрқәа рфедерациа ахаҭарнак Аҳмаҭ Хапат ишааицҳаз ала атерракт аан иҭахаз рсиа изныкымкәа игәаҭан, аԥсуа диаспора рхаҭарнакцәа рҟынтәи аӡәгьы акгьы имыхьит.
Инар Гыцба иара убасгьы иазгәеиҭеит асиа еиҭах аиҭагәаҭара шымҩаԥысуа. Уи ашьҭахь еилкаахоит кавказтәи адиаспораҟынтәи ӡәыр дҭахоу дҭамхоу.
Аҵыхәтәантәи адыррақәа рыла иҭахеит 36-ҩык ауааԥсыра, ахәрақәа роуит 147-ҩык.
