АҞӘА, рашәарамза 29 – Sputnik, Бадри Есиава. Аԥсны агеографиатә еилазаара ахада Леуард Барцыц игәаанагарала Аԥсны ашьхара аҳауатә ҭагылазаашьа анхаразы еиӷьу ыҟам. Ажәытәан шамахамзар аԥсуа қыҭақәа зегьы аҩадарахь, ашьхара иахьаԥну акәын иахьыҟаз, иаҳҳәап Дал, Ҵабал, Аибга, Ԥсҳәы уҳәа егьырҭгьы.
"Ҳабацәа ашьха иахьаԥныз акәын еиҳарак нхарҭас ҳәа иахьалырхуаз. Уи мзызны иамаз уатәи аҳауатә ҭагылазаашьа агатәи аҳауа аҵкыс анхаразы акырџьара еиӷьны иахьыҟаз ауп. Ашьхантәи шәылбааит ҳәа анҳарҳәогьы ҳацәымгәаакәа ҳазԥагьаны иҳадаҳкылар алшоит", — иҳәеит иара.
"Ҳара ашьхақәа ҳшырзыҟоу еиҭаҳкроуп. Атуристцәа рымацара ракәым аҭыԥантәи ауааԥсыра рзынгьы алшара рацәа ҳарҭоит ҳашьхақәа. Аԥсабара иаҳнаҭаз алшамҭақәа ишахәҭоу еиԥш ахархәара ҳалшом", ҳәа азгәеиҭеит Барцыц.
Леуард Барцыц иажәақәа рыла аԥсуаа ажәытәан абназареи, адгьылқәаарыхреи, арахәааӡареи рыдагьы аԥсабареи дареи реидҳәалара аҵак ҷыда аманы иҟан.
Раԥхьатәи ҳәырԥсарраны иара иазиԥхьаӡоит аԥшьаҭыԥқәа, ашәарыцара азин ахьыҟамыз. Уажәы ауаа ашьхарахь ихалоит шәарыцара ҳәа ианаарҭахха, иахьаарҭаххаз. Еиҵагыло аҿар аус рыдулалатәуп аԥсабара ахьчареи ҳаҭырла азнеиреи рҵарц азы.
Кавказтәи ашьхақәа уникалтәқәоуп. Араҟа иуԥыло ахьӡқәа (Адаужырҭа аиԥш иҟақәо) удмырхәыцыр залшом, иҳәоит иара.
