АҞӘА, рашәарамза 30 – Sputnik, Бадраҟ Аҩӡба. Олег Баграт-иԥа Шамба дҵарауаҩ дуун, итәыла дапатриотын, иҳәеит ҳкорреспондент диҿцәажәо Агуманитартә ҭҵаарақәа ринститут адиректор ихаҭыԥуаҩ Сослан Салаҟаиа.
"Декономистын, акыр ҭҵааратә усумҭақәа дравторын. Амилаҭтә-хақәиҭратә ҵысра алахәылак иаҳасабала илшамҭақәа акырӡа аҵакы рыман, ишьардан. Аибашьраан акәзар, Олег Баграт-иԥа активлаҵәҟьа аиҿцәажәарақәа зегьы дрылахәын. Акыр ақәгыларақәа мҩаԥигеит", — иҳәеит Салаҟаиа.
Сослан Салаҟаиа иара убасгьы иазгәеиҭеит иҭҵаарадырратә усура адагьы Олег Шамба ишьахәыз ажәеинраалақәа дравторын.
"Иара убасгьы еизигон аԥсуа жәаԥҟақәа, иҭижьхьан урҭ урысшәалеи ҭырқә бызшәалеи еиҭаганы", — иҳәоит иара.
Аԥснытәи Аҳәынҭқарратә университет аректор ихаҭыԥуаҩ, академик Олег Шамба диит мшаԥымза 19 1938 шықәса рзы.
1957 шықәса рзы Аҟәатәи ашкол № 10 далгеит. 1957-1962 шықәсқәа рзы аҵара иҵон Москва. 1965 шықәса рзы Аԥсны Ақыҭанхамҩа аминистрраҟны аусура далагоит. 1975 шықәса рзы акандидаттә диссертациа ихьчоит.
1992-1993 шықәсқәа рзы Аԥсуа радио аҟны арратә корреспондентс дыҟоуп. Аибашьра ашьҭахь Аԥсны Аекономика аминистр актәи ихаҭыԥуаҩыс, нас ихаҭыԥуаҩыс аус иуан. Иара убасгьы аус иуан Аԥснытәи Аҳәынҭқарратә университет аҟны.
1997 шықәса инаркны иахьанӡа ауниверситет аректор ихаҭыԥуаҩыс дыҟан. 1998 шықәса рзы ианашьан апрофессор ҳәа ахьӡ.
Олег Шамба —360 рҟынӡа арадиорепортажқәеи астатиақәеи, 190 ҭҵаарадырратә усумҭеи дравторын.
