АҞӘА, рашәарамза 30 — Sputnik, Владимир Бегунов. Атәыла Ахада Иусбарҭа аус аднаулеит атәымтәылауаа ркатегориақәак рзы визада аиҭанеиааира шьақәзырӷәӷәо Адҵа апроект. Уи инақәыршәаны Аԥсны визада алалара азин роуеит атәымтәылауаа-аекскурсантцәа, уахыки-ҽнаки ҳәа заамҭа ҿахҵәоу, Беларусиеи Ҟазахсҭани ртәылауаа, ҩымчыбжьа ҳәа Аԥсны зыҟазаара ҿахҵәоу. Абри атәы аҳәоит атәыла Ахада иофициалтә саит. http://presidentofabkhazia.org.
Аԥсны Аҳәынҭқарра визада алалареи алҵреи азин змоу рзы азакәан амчра аиуит мшаԥымзазы. Уажәы атәымтәылауаа ркатегориақәа шьақәзырӷәӷәо адҵа апроект шьақәырӷәӷәоуп, ҳәа иажәақәа ааргоит Аусбарҭа анапхгаҩ ихаҭыԥуаҩ Дмитри Шамба.
Атәыла Ахада идҵа апроект аҟны атәымтәылауаа-аекскурсантцәа, уахыки-ҽнаки ҳәа заамҭа ҿахҵәоу, Беларусиеи Ҟазахсҭани ртәылауаа, ҩымчыбжьа ҳәа Аԥсны зыҟазаара ҿахҵәоу рыдагьы ари азакәан ахь иаҵанакуеит Аԥсныҟа авариақәа раԥыхреи, афымцасистемаҿ аремонттә усурақәа рымҩаԥгареи, Галтәи Тҟәарчалтәи араионқәа рҟны афымцацәаҳәақәа еиҭашьақәззыргыло атәымтәылауаагьы. Урҭ Аԥсны визада иҟазар алшоит хәымш ирхымгакәа.
