АҞӘА, пхынгәымза 1 – Sputnik, Роберт Џьапуа. Аԥсны Аҳәынҭқарра Аҩныҵҟатәи аусқәа рминистрра иазырыԥхьаӡоит аминистр Леонид Ӡаԥшьба иқәгылара дара рыҳаҭыр, рыпату лазырҟәуа акакәмызт ҳәа. Абри атәы аҳәоит дара аминистрра аилазаарахь инарышьҭыз аҳәамҭаҟны.
"Аҩныҵҟатәи аусқәа рминистрра аилазаара реиҳараҩык рграждантә уалԥшьа бзианы еилыркаауеит. Убри инамаданы аминистр Леонид Ӡаԥшьба иқәгылара, аемоциа ӷәӷәа шаҵазгьы ибзианы еилаҳкаауеит, аӡәы диршәап, дирԥхашьап ҳәагьы игәы иҭаны ҳахәаԥшуам", ҳәа аҳәоит аҳәамҭаҟны.
Иара убасгьы аҳәамҭаҟны инаҵшьны иазгәаҭоуп абжьыҭира ахалархәра мамзаргьы ахаламырхәра дасу иусуп, иламыс ишиҵанаҳәо еиԥш дныҟәоит ҳәа.
"Амилициа рнапы иану азинеиҿкаароуп, ареферендум амҩаԥысра аамҭазы ашәарҭадара аиқәыршәароуп", ҳәа ацуп аҳәамҭаҟны.
Аминистр актәи ихаҭыԥуаҩ Борис Абитов аиԥылараҟны иҳәеит ауаажәларратә еиҿагылара ҵарны ишыҟоу, аиҳаракгьы уажәы, ареферендум аламҭалазы.
"Ҳара атәыла аполитикатә ԥсҭазаара ҳҽалархәра Аконституциа ззин ҳнаҭаз акоуп. Иара убри аан ҳарҭ зегьы ибзианы иаадыруазароуп азинқәа шҳамоу еиԥш аҭакԥхықәрақәагьы шҳаду", — иҳәеит Абитов.
Аҳәамҭа рнапы аҵаҩуп 80-ҩык инареиҳаны Аҩныҵҟатәи аусқәа рминистрра аусзуҩцәа.
