АҞӘА, ԥхынгәымза 1 – Sputnik, Саид Барганџьиа. Аԥсны ашьапылампыл азы еизго акоманда ашьапылампыласыҩцәа амилаҭтә форма рышәны рфотосахьақәа зну абаннерқәа Аԥснытәи амҩадуқәа рҟны икыдырҵеит. Амультимедиатә хаб Sputnik Аԥсны апроект ҿыц рызкуп Ашьапылампыл азы адунеи ачемпионат ConIFA 2016 аҟны аиааира згаз Аԥснытәи ашьапылампыласыҩцәа, иҳәеит амультимедиатә хаб аиҳабы Инал Лазба.
Иара иазгәеиҭеит сынтәа Аԥсны ConIFA аверсиала имҩаԥысуаз адунеитә чемпионат аҟны аԥыжәара шыргаз, ашьапылампыл атематика акәзар ателехәаԥшроума, агазеҭқәеи ажурналқәеи роума, аинтернет саитқәа роума рҟны хадара аманы ишыҟаз. Лазба иазгәеиҭеит ари атематика ишацнаҵаз Франциа имҩаԥысуа Европатәи Ачемпионат ЕВРО-2016.
"Сара сгәы иаанагоит уажәы иаамҭаҵәҟьаны идәықәаҳҵеит апроект ҿыц "Ухәмаруа уаиааи". Амилаҭ рымаҭәа зшәу ҳшьапылампыласыҩцәа — Аԥсны имҩаԥысуаз ConIFA ачемпионат инацҵаны адунеи зегьы ҳкультура, ҳҭоурых, ҳқьабызқәа удырбоит ҳәа сгәы иаанагоит", — иҳәеит Лазба.
Лазба иазиԥхьаӡоит миллионҩыла Аԥсны иаҭаараны иҟоу аԥсшьаҩцәеи аныҟәаҩцәеи ачемпионат аҟны ҳиааиреиԥш аԥсуа шьапылампыл аҭоурыхгьы рбап, ираҳап ҳәа.
"Апроект еиҭахгьы иахықәкны иҟоуп аԥсуа ҿар рыҩныҵҟа ашьапылампыл аларҵәара. Сгәы иаанагоит аинформациа ахархәарала аспорттә дунеи Аԥсны иазхьаҳарԥшыр ҳалшоит ҳәа. Амилаҭ маҷқәа ашьапылампыл ибзиаӡаны ихәмарыр шрылшо Аԥсны лабҿаба иаанарԥшит", инаҵшьны иазгәеиҭеит Инал Лазба.
Sputnik Аԥсны апродиусер Амина Лазԥҳа илҳәеит Sputnik Аԥсны апроект ҿыц "Ухәмаруа уаиааи" аиааиреи уи иацыз агәырӷьареи ҳзаазгаз ҳшьапылампыласыҩцәа ҭабуп ҳәа раҳәара иаформа хкуп ҳәа.
Лара еиҭалҳәеит апроект ҩ-етапкны ишымҩаԥысуа. Актәи аетап аан еиҿкаан ашьапылампыласырҭа дәы аҟны амилаҭ маҭәа зшәу аспортсменцәа рфотосессиа.
"Дара милаҭтә фырхацәахеит. Ус анакәха иарбанызаалак аҽа цәамаҭәак уи рстатус азышьҭыхуам. Иахьа инаркны атәыла ахы-аҵыхәа икыдҵахоит абаннерқәа", ҳәа азгәалҭеит Амина Лазԥҳа.
Апродиусер иара убасгьы илҳәеит апроект аҩбатәи аетап ишазыԥхьагәанаҭо ахәмарыҩцәа рнапынҵамҭақәа зну афутболкақәа рҭыжьра. Уажәы урҭ адизаинертә усадулара аетап аҟны иҟоуп.
"Абаннерқәа ркьыԥхьраҿ ацхыраара ҳннаҭеит аилахәыра "Аҟәафон", афутболкақәа рҭыжьраҿы иҳацхраауеит "Жәларбжьаратәи афонд Аԥсны" ҳәа ҳзеиҭалҳәеит Амина Лазԥҳа.
"Аҟәафон" ахаҭарнак Гета Арӡынԥҳа иазгәалҭеит Ачемпионат аныхдыркы инаркны аилахәыра "Аҟәафон" апартниортә ҟазшьа шааннакылаз.
"Ҳара иаҳбарҭан ачемпионат аидкылара ишазырхаз. Ҳара ҳхаҭақәагьы иҟаҳҵеит абаннерқәа, ҳчемпионцәа риааира рыдаҳныҳәалеит", — лҳәеит лара.
Лара лажәақәа рыла аилахәыра иаразннакы иадгылеит Sputnik Аԥсны аԥшьгара.
"Ҳәаррада ари аҩыза апроект интерес ҳзавсуамызт. Уи адагьы Sputnik аҩыза апартниор аус ацура ҳаҭыруп, ихьӡуп", лҳәеит Гета Арӡынԥҳа.
Лаҵарамза 28 инаркны рашәарамза 5 рҟынӡа Аԥсны имҩаԥысуан ашьапылампыл азы Адунеи ачемпионат ConIFAаверсиала. Атурнир иалахәын 12 команда. Афиналтә хәмарраан Аԥснытәи акоманда аиааира агоит.
