АҞӘА, ԥхынгәы 5 — Sputnik, Бадраҟ Аҩӡба. Аԥсны аоппозициатә мчрақәа реизара мҩаԥысит Афилормониа аҿаԥхьа. Аоппозициаа дҵаны иқәдыргылоит ареферендум амҩаԥгара арыцхә ҭагалан ахь анахара. Абри атәы ааицҳаит ҳкорреспондент аҭыԥ аҟынтәи.
"Ԥхынгәы 10 рзы иҟалараны иҟаз ареферендум аҭыԥ змаз аҭагылазаашьақәа ирыхҟьаны иаԥырҟәҟәаахеит. Убри инадҳәаланы атәыла Ахада иахь ажәалагала ҟаҳҵоит ҳзакәантә зинқәа неигӡарц, иаҳҳәо дадгыларц", — иҳәеит "Амцахара" ахантәаҩы Алхас Кәыҵниа.
Аоппозициаа ррезолиуциаҟны иарбоуп аҳәынҭқарратә телехәаԥшраҿы ажәа аиура, Ауаажәларратә хылаԥшратә хеилак аусура аиҭашьақәыргылара. Уахь аоппозициа алахәылацәагьы алагалатәуп ҳәа арбоуп.
Иара убасгьы дара дҵаны иқәдыргылоит Аҩныҵҟатәи аусқәа рминистр Леонид Ӡаԥшьба имаҵура дамхзарци зыҿҳәара иахыԥахьоу апаспортқәа рыла абжьыҭира азин ҟарҵарци.
Убри инацҵаны дҵаны иқәдыргылоит Урыстәыла аҵакырадгьыл аҿгьы ареферендум амҩаԥгаразы абжьыҭирҭа ҭыԥқәа аартхарц.
"2014 шықәсазтәи ахҭысқәа аҽазнык рыҟамларазы иаԥшьган ареферендум. Апартиа "Амцахара" ареферендум амҩаԥгара аидеиа иадгылеит. Амчра ршәарылеи қәымчралеи иалшоз зегьы ҟанаҵеит ареферендум амҩаԥгара аԥырҟәҟәаазарц", — иҳәеит Кәыҵниа.
2016 шықәса хәажәкырамзазы аԥшьгаратә гәыԥ, 46-ҩык злахәыз, Алхратә центртә комиссиахь ашәҟәы наргеит атәыла Ахада заанаҵы еиҭалхразы ареферендум мҩаԥгахарц. Рашәарамза 1 азы атәыла Ахада Рауль Ҳаџьымба Адҵа инапы аҵеиҩит ԥхынгәы 10 2016 шықәса рзы ареференддум мҩаԥгазарц.
