АҞӘА, ԥхынгәы 7 – Sputnik, Рада Ажьиԥҳа. Аҟәатәи аџьаамахьы аныҳәахь инеиит зықьҩык инареиҳаны Аԥснытәи аԥсылманцәа, ҳәа ҳкорреспондент илзеиҭеиҳәеит Аԥснытәи аԥсылманцәа Иаку рдоуҳатә усбарҭа ахантәаҩы Салих Кәарацхьелиа.
"Аԥснытәи аԥсылманцәеи адунеи аԥсылманцәа зегьи ирыдысныҳәалоит аныҳәамш. Иахьа имҩаԥысуеит ихымԥадатәиу аныҳәатә матанеира. Иахьатәи аныҳәахь иааиит зықьҩык инареиҳаны аԥсылманцәа", ҳәа азгәеиҭеит Кәарацхьелиа.
Иара иажәақәа рыла Рамадан мзазы аԥсылманцәа аурычра иҵалоит адоуҳатәи ацәеижьтәи ҽрыцқьаразы.
"Рамаданмзазтәи аурычра иазыԥхьагәанаҭоит шьыжьы инаркны амра ҭашәаанӡа афатәи аӡи рыдымкылара. Абри иқәымныҟәар зылшо згәабзиара уашәшәыроуи, ахәыҷқәеи ибыргқәоуи роуп. Аурычра аԥсылманцәа зегьы рзы ныҳәа дууп", — иҳәеит Кәарацхьелиа.
Аурычра иҵоу ауаҩы ихы-иԥсы ааникылоит, Аллаҳ дышимҵахырхәо ааирԥшуеит. Уи Иаҳхылаԥшхәу уизааигәанатәуеит.
Салих Кәарацхьелиа иара убасгьы иҳәеит апарк "Алакә" аҟны ахәыҷқәа рзы хәыда-ԥсадатәи аттракционқәа аус шыруаз, аниматорцәа злахәыз апрограмма шеиҿкааз.
Аԥсылманра аканонқәа инарықәыршәаны Рамадан амза алагара ҳәаақәырҵоит ҩ-хкык рыла: ҿыц игылаз амза абара алыршарала, ма ииасуа амза 30-мшы рыла ахыркәшарала.
Сынтәа иара алагеит рашәарамза 6 ауха.
