ГӘДОУҬА, ԥхынгәы 10 — Sputnik, Рада Ажьиԥҳа. Ареферендум ахь ауаа ҳнеинддаз ҳәа иҟаӡам. Избанзар дара ҭынч инхаларц рҭахуп, ҳәа ҳкорреспондент илеиҳәеит Аԥсны Жәлар Реизара адепутата Леонид Чамагәуа.
"Атәыла Ахада заанаҵы иалхра актуалра алаӡам. Заанаҵтәи алхрақәа – аимак-аиҿак рыцуп, аҭагылазаашьа еиҭасра рыцуп. Ажәлар ҭынч инхар-инҵыр рҭахуп", — иҳәеит " Аԥсны Жәлар Реизара адепутата Леонид Чамагәуа.
Адепутат иажәақәа рыла ареферендум аҿҳәара ҭагалан ахь аиагарагьы акгьы еиҭанакуа иҟамызт.
"Сыгәра жәга, ареферендум ҭагалан имҩаԥысуазаргьы иахьеиԥш акәхон ауаа рааира шыҟалоз", — иҳәоит иара.
Аԥшьгаратә гәыԥ ишьақәнаргылаз ашәҟәқәеи еизнагаз ауааԥсыра рнапынҵақәеи ҵаҵӷәыс иҟаҵаны 2016 шықәса хәажәкырамзазы Ацентртә алхратә комиссиа иадгалан ареферендум амҩаԥгаразы арзаҳал.
Атәыла Ахада идикылаз Адҵала ареферендум мҩаԥысраны ишьақәыргылан ԥхынгәы жәаба.
