АҞӘА, ԥхынгәы 13 – Sputnik, Роберт Џьапуа. Ишауала иаарласны аказначеитә системахь ииастәуп. Аказначеитә системахь аиасра иалнаршоит аҳәынҭқарратә усҳәарҭақәа имҩаԥырго афинанстә операциақәа аартны рбара, иҳәеит ареспублика араионқәеи ақалақьқәеи рхадацәа реиԥылараҟны Аԥыза-министр Артур Амқәаб.
"Аказначеитә система абанктә система иаҿурԥшуазар аԥыжәарақәа амоуп. Урҭ ҳхы иаҳархәароуп. Иҟоу ауадаҩрақәа ҳариааины ишалшо ала абри асистемахь ҳаиасыроуп", — иҳәеит Аԥыза-министр.
Атәыла аиҳабыра рхада аҽазныкгьы дазааҭгылеит аказначеитә системахь аиасра иалнаршоит аҳәынҭқарратә усҳәарҭақәа имҩаԥырго афинанстә операциақәа аартны рбара шалнаршо.
"Аҳәынҭқарра амал аныхра хылаԥшра аҭара еиҳа иманшәалахоит, имариахоит. Аус даара ҭакԥхықәрала изызнеитәу усуп. Насоуп иара еиҳа хра аманы аусура ианалаго", — иҳәеит Артур Амқәаб.
Аԥсны Афинансқәа рминистрра Аказначеитә усбарҭа официалла аусура иалагеит 2016 шықәса ԥхынгәы 1 инаркны. Иара аԥҵара иақәхарџьын 80 миллион мааҭ аԥара. Урҭ рҟынтәи 90 процент урыстәылатәи аԥарақәа роуп.
Иара рымаҵ ауеит ареспубликатә биуџьет иатәу 169 усбареи аҭыԥантәи абиуџьет иатәу 222 усбарҭеи. Иаартуп 240 хаҿытә ԥхьаӡара ареспубликатә биуџьет аганахьала, 444 хаҿытә ԥхьаӡара – аҭыԥантәи абиуџьет аганахьала. Аусбарҭа напхгара аиҭоит Џьансыхә Нанба.
